公視新聞網 https://news.pts.org.tw/article/721015
「鬧熱關渡節」拜六起鼓 用藝術呈現在地故事
發布時間：2024-10-24 19:15 更新時間：2024-10-24 23:28
https://www.youtube.com/watch?v=-fZEFOLJzdY
2024「鬧熱關渡節」拜六（26）起鼓，到時陣，干豆（關渡）街仔會有500个人同齊踩街
鬥鬧熱。今年是關渡節第10年，特別用干豆豐富的湳仔生態做主題，邀請藝術家做伙佇社
區創作。這10年來，因為社區居民、學校、民間企業各界熱情參與、鬥相共，希望干豆的
地方特色、自然文化予閣較濟人知影。（新聞標題、導言及內文皆為臺語文）
對音樂的節奏展翼跳舞，關渡里舞蹈班的成員扮演做過冬鳥，當咧準備拜六關渡節的舞蹈
表演。關渡（kan-tāu）有豐富的湳仔地生態，是過冬鳥重要的生湠地，這改2024鬧熱關
渡節也特別以「過冬鳥」佮「湳仔地」為主題，透過藝術創作的方式，用音樂、舞蹈、在
地食食，去展現人佮關渡地區之間的故事。
臺北市關渡里舞蹈班 成員：「我感覺參加這个活動袂bái，就像嘉年華仝款，足鬧熱。
有在地的文化、有媽祖、有北藝大的舞蹈團，就是有結合地方的特色。」
藝術家也運用廢棄物來妝娗，予遮的資源回收材料閣再利用，展現新的性命力閣有關渡過
冬鳥的特色。
藝術家 瑞文：「遮的廢棄物閣再利用，就有無仝的效果，看起來予逐家知影，咱這个主
題就是欲維護湳仔地，閣有足濟共咱療癒的這寡鳥仔。」
2024鬧熱關渡節拜六起鼓，主辦單位表示今年關渡節拄好滿10歲，這10年來，透過和在地
居民、學校、民間企業佮團體共同合作，予關渡地區有閣較豐富的性命力，進前因為疫情
的關係已經兩冬無辦踩街的活動，今年計共會唌當地500个民眾做伙來踩街大遊行。除了
踩街活動，到時陣現場也會有市集、體驗工作坊，活動結束也會共以湳仔地為主題的藝術
作品展現佇關渡各社區的角落，希望予民眾鬥陣來認捌關渡的自然文化底蒂。
記者 張佳倪 謝季潾 臺北報導
唐嘉良/編輯