公視新聞網 https://news.pts.org.tw/article/721352
國家語言發展會議第2日 學者講語言復振經驗
發布時間：2024-10-27 19:15 更新時間：2024-10-27 20:06
呂尚儒 / 地方報導
https://www.youtube.com/watch?v=7cUCVvzLXbg
今仔日是國家語言發展會議正式大會第2工，大會邀請著英國學者來分享語言復振的經驗
，另外一方面，咱國家語言研究發展中心草案，到今猶咧等立法院排審。語言學者張學謙
就指出，國家的專責單位除了愛規畫詳細，嘛應該保證各種國家語言攏有公平的資源佮待
遇。（這條新聞標題、導言、內文是台語文。）
語發會議自七月到今，中間各界針對台語名稱有真濟爭議和討論，驚台語變做新的霸權，
文化部長咧正式大會總回應的時強調，這馬濟濟族群語言攏是國家語言，袂閣有獨尊某一
个語言的狀況。文化部嘛表示未來為著欲促進社會，通有愈濟接觸無仝語言的機會，拍算
欲透過打造語言產業的方式，增加濟濟國家語言的就業機會，嘛予少年家咧學習的時愈有
動力。
文化部長 李遠：「原住民語言抑是客語的語族，真驚台語會成做新的霸權，因為伊人口
有較濟，我想應該是袂。因為咱五十年來攏強迫講華語，講其他方言攏愛掛狗牌，這就是
政治上大的錯誤。這馬咱欲共改起來，是需要一段時間。」
另外，為著欲予台語、原住民語等國家語言，通有全面性的語言政策來支持佮施行，行政
院佇咧今年6/27宣佈通過國家語言研究發展中心設置條例草案(簡稱語發中心草案)，佇咧
威爾斯嘛有通過立法成立相siâng的獨立機關，威爾斯的語言副專員表示，in除了愛規畫
復振威爾斯語的語言政策，目前講威爾斯語的人口干焦50萬才佔總人口16%外，怹向望咧
2050年達成100萬人的目標，怹嘛著監督政府敢有達成目標。
英國威爾斯語言副專員 Osian Llywelyn：「阮愛予in承擔責任，同時嘛愛佇關鍵的政策
問題上提出建議，遮的問題包括教育、衛生、廣播、規畫、蹛房等等，阮閣有一項具體義
務，每五年發佈一份關係威爾斯語狀況的報告。」
抑若台灣未來欲設立的語發中心，學者張學謙表示，除了愛予民眾面對家己的族群語言有
正面的態度，嘛著確保各種國家語言攏通得著公平的資源佮待遇。
臺東大學華文系教授 張學謙：「就是講我平平是人，我應該享有的語言權利，是毋是有
得著國家的保障，佮經費的支持。」
張學謙嘛強調，雖然語發中心的設立，已經得著行政院的支持，今猶閣咧立法院等排審，
會過袂過猶毋知，伊認為無論結果按怎，民間猶原愛維持組織合作的韌性，予台語通繼續
發展落去。
陳稷安/編輯