公視新聞網 https://news.pts.org.tw/article/721717
火炮訓練震害去？ 湖口基地附近12間厝必巡
發布時間：2024-10-29 19:15 更新時間：2024-10-29 21:11
張君豪 / 採訪報導
https://www.youtube.com/watch?v=y3txHyOZ6wE
中國的軍機軍艦不時來擾亂台灣，兩岸局勢緊張，國軍為著保衛國家，嘛攏有加強演練。
毋過佇新竹陸軍湖口訓練基地，傳出附近有12間人家厝，若親像是因為軍方常在進行火炮
訓練，除了火炮聲真困擾，這馬連民宅內外也出現大面積的必巡，民眾煩惱徛家安全出問
題向軍方反映，軍方今仔也派人去現場了解狀況。（此則新聞標題、導言、內文皆為臺語
文。）
厝內的壁攏一巡一巡，連塗跤的thài-lù嘛必開，行出來外口閣會當看著，厝主用紅毛
塗補過的痕跡，蹛佇湖口基地附近十幾冬的民眾講今年因為軍方較捷演習，厝內損害的狀
況特別嚴重。
當地居民講：「就是會煩惱，上主要是驚主樑佮楹仔會崩落來。」、「就驚會倒落來，你
看只要火炮一下拍的時陣，（壁）就會必開。」
里長指出，今年湖口基地、對年初開始、就定定進行火炮訓練，有時陣一禮拜4、5工、對
早起練到暗時，造成逐家真大的困擾，目前有12戶傳出受影響。
新竹縣新埔鎮上寮里長劉德文講：「最近(火炮)訓練較捷，然後厝內的楹仔有必開的現象
，若是講真正去傷害著人民的權益，抑是身體健康的部分，確實軍方應該愛來負責，提供
補救的方式。」
軍方收著當地人的反應了後，拜二(29) 揣監測單位來評估民宅的狀況，也答應上緊一禮
拜內會招逐家進行相關的協調。
教準部政戰主任張國書講：「揣第三方公正單位來看，阮是依照法規來辦理，上緊一禮拜
內會成立糾紛協調小組，會揣新埔鎮公所閣有村里民來共同來協調。」
軍方講等監測數據出來了後，若確定是因為火炮造成的，軍方就會負起責任。民眾是指出
過去為著國家安全，會當忍受火炮造成的噪耳聲，毋過這馬煩惱的是蹛的安全，希望相關
單位重視。
曹詠涵/編輯