公視新聞網 https://news.pts.org.tw/article/722607
第15屆金音獎結果公佈 濟濟台語作品受肯定
發布時間：2024-11-04 20:24 更新時間：2024-11-04 20:24
呂尚儒 莊浚佑 / 地方報導
https://www.youtube.com/watch?v=oNicUGGFLJo
金音創作獎是文化部主辦的，逐年會公佈臺灣流行音樂的原創音樂獎項，今年已經來到第
15屆，今年攏總有3,877件作品參賽，最後選出21个獎項。今年也有優秀的台語歌、台語
專輯著獎，包括農村武裝青年、拍謝少年等等創作的台語歌，有學者認為台語運動已經來
到關鍵時刻，看著濟濟新世代創作者，用台語表態，久來就會有tshuā頭的效果，帶動母
語的復振。（此則新聞標題、導言、內文皆為臺語文。）
臺灣獨立樂團「農村武裝青年」，以一首台語歌〈阿母的話〉得著第15屆金音獎最佳民謠
歌曲獎的肯定，主唱江育達強調：「民謠哪有可能無土地，土地哪有可能無母語」鼓勵逐
家講母語。in嘛講：「講家己的話是基本的人權，講家己的話是身為一个人的尊嚴，對這
馬開始，咱做伙拍拚將家己的母語講轉來，甚至共寫轉來、讀轉來！」
另外，今年金音獎猶閣有「拍謝少年」的台語專輯《噪音公寓》得著最佳搖滾專輯獎。最
佳搖滾專輯獎拍謝少年講：「若是史明前輩伊若是咧耍音樂，我感覺伊可能會想講，愛先
做一个臺灣人才做一个音樂人。這个話我感覺欲送予逐家，就是咱愛做一个臺灣人，唱臺
灣的故事，共阮的故事唱予恁聽。」
以台語搖滾音樂出名的「拍謝少年」引用倡議「臺灣民族主義」的革命家史明的話，向望
用音樂唱臺灣的故事，肯定臺灣人的身份。長期做文化研究的教授莊佳穎表示，這幾年開
始有一寡台語創作者，有意識咧公開場合用台語致詞，伊認為台語運動已經來到關鍵時期
，慢慢仔咧透過較大眾化、較柔軟的方式咧共台語議題楦闊。
臺師大台文系主任莊佳穎認為：「咱會希望咱做創作者、表演者，這个語言本身毋但是表
演，伊更加是咧做一種生活，有人行佇咧頭前衝甲足緊的，這種的人嘛應該愛有，因為無
頭前的人你方向就無法度掠予牢，嘛愛有較柔軟的徛佇中央的人，伊才會當共猶未入來的
人箍入來。」
學者認為濟濟老一輩的台語創作者無一定有台語意識，嘛真歡喜看著有愈來愈濟新世代的
台語創作者、抑是意見領袖，沓沓仔用無仝方式用台語表態佮身份認同，伊認為按呢久來
就會有頭的效果，帶動臺語的復振。
曹詠涵/編輯