公視新聞網 https://news.pts.org.tw/article/723155
高雄地檢署統計 詐欺連4冬排刑事犯罪頭名
發布時間：2024-11-07 19:15 更新時間：2024-11-07 23:56
https://www.youtube.com/watch?v=Xf3af6YS8l4
根據地檢署偵查案件統計，連紲四年，詐欺案件是刑事犯罪的頭名。高雄市刑警大隊就掠
著一个詐騙集團，主嫌是5个好額人兜的囡仔，怹和律師佮代書這寡專業人士，除了提供
共犯法律協助，閣會用代書開假的債權契約，共查扣的賊仔數目提轉來。（新聞標題、導
言及內文皆為臺語文）
警察：「覆咧！手機仔！」
鳳山分局警員埋伏佇咖啡廳，掠著這位24歲的車手，有一位查某受害者予伊騙兩擺，佳哉
現場掠著人也查著證物。另外，高雄市刑警大隊也偵破一件投資虛擬貨幣的詐騙集團，怹
是舊年先掠著車手，向源頭偵辦才發現，集團內底有律師鬥相共。
高雄市刑警大隊偵一隊長 許強生：「委任的律師差不多攏是這位姓陳律師，阮警方嘛起
憢疑，哪會攏是這个律師做辯護，原來這位律師是透過辯護，提著車手的筆錄閣有查扣的
內容。」
警方追查發現，詐騙集團除了揣姓陳律師做報馬仔，嘛揣厝內開地政士事務所的姓溫的查
埔人，假做代書騙受害者賣厝投資，甚至開假債權本票，共檢警查扣的錢提轉來。
高雄市刑警大隊偵一隊長 許強生：「要求被害人簽立假債權的本票以及契約，交予假代
書溫嫌送交地方法院來執行，共警方查扣遮的無法度隨做定位的腌臢錢，提轉來閣交予詐
騙集團，保障怹詐騙集團的得利。代書佮律師分別扮演兩个角色。」
這個集團五个投資的金主，攏是阿舍囝，厝內生活攏誠好過，怹煞結合律師佮代書，利用
投資詐騙，四個月內就賺著四億外，這馬檢警共怹名下的不動產佮名車全部查扣，將21人
起訴，檢方也請法院共判重刑。
記者 邱紹揚 高雄報導
唐嘉良/編輯