公視新聞網 https://news.pts.org.tw/article/723284
超高齡+少囝化 5G專網技術望解決欠工問題
發布時間：2024-11-08 16:01 更新時間：2024-11-08 17:07
https://www.youtube.com/watch?v=8AfD2L8n5lI
明年臺灣欲成做超高齡社會，包括老人照護、少囝話、欠工的議題，攏會影響國家發展。
數發部、工研院，希望運用5G專頻專網的技術，機器會當直接通網路使用，運用佇醫療、
農業，予產業界未來咧做工課的時通愈利便。（新聞標題、導言及內文皆為臺語文）
明年臺灣欲成做超高齡社會，包括老人照護、少囝話、欠工的議題，攏會影響國家發展。
數發部、工研院，希望運用5G專頻專網的技術，機器會當直接通網路使用，運用佇醫療、
農業，予產業界未來咧做工課的時通愈利便。
機器人聽著指示，隨就準備欲去巡病房，這是工研院、佮數發部，合作的5G專頻專網技術
，所以in特別辦一个展覽，予民眾看這馬5G是按怎運用佇生活當中。這个5G專頻專網、伊
是有專門的5G線路，予機器通直接通thong網路使用，這改工研院共5G結合醫療，開發出
一臺會當照顧病人的機器人。
工研院材化所工程師蔡和欣予民眾紹介，「機器人會當綴護理師去巡病房抑是傳達資訊，
抑是講提供衛教指引，另外就是若醫生、護理師人無佇患者邊仔，伊會當提供視訊看診的
方式。」
2025年臺灣就欲進入超高齡社會，尤其現代人囡仔生少，未來產業界欠工的問題恐驚會愈
來愈嚴重，遮的攏是真要緊的問題。這馬透過5G專頻專網的技術，除了做工課通愈有效率
、嘛通解決欠工的問題。現場共技術應用佇醫療佮農業等等，比論農民就會使利用監測香
菇的影像，隨時看菇寮的狀況，通代替人工去巡菇寮。
工研院服務系統科技中心技術副組長詹嘉維說明，「透過這个AI辯識系統，會使去解決這
馬農業欠工的問題，阮佇菇場就共系統囥咧一台自走車頂，伊就會使代替咱人去巡場。」
數發部結合5G專頻專網的技術，希望利用科技，行向智慧國家。數發部嘛佇臺北華山文創
園區辦展覽，希望予民眾鬥陣來參與、予科技簡單進入咱的生活。
吳思薇/編輯