公視新聞網 https://news.pts.org.tw/article/726615
政院修民法刣懲戒權 兒福聯盟：鼓勵正面教育
發布時間：2024-11-29 19:15 更新時間：2024-11-29 22:14
https://www.youtube.com/watch?v=jPGR-3_rcL0
行政院會拜四（28）共《民法》第1085條修正草案，現有條文內面「懲戒」兩字刣掉。有
家長就趒起來，認為無「懲戒」這兩字是袂當教囡仔。兒童福利聯盟表示，嘛是會當處罰
囡仔，毋過愛用正面的方式、莫傷害囡仔做原則。（新聞標題、導言及內文皆為臺語文）
囡仔佇公園走來走去，真古錐，毋過有當時仔會無聽話，會感覺真欠拍。
家長：「拍啊，是按怎莫拍？」
家長：「就是罵伊啊，口氣較歹。」
家長：「有當時仔會足氣的啦，毋過猶是莫拍較好。」
行政院會拜四通過民法修正草案，將第一○八五條「爸母會當佇必要範圍內，懲戒囡仔」
，共內底的「懲戒」二字刣掉，真濟民眾煩惱講，共「懲戒」兩字提掉，家長就無法度教
示囡仔。衛福部是表示，未來會佮教育部，做伙討論建立親子教育資源，目前佇各縣市攏
有設家庭教育中心，提供家長諮詢服務。
教育部國教署學務校安組專委 薛承祐：「設立家庭教育中心，若家長有親子教養的疑難
雜症，攏會當實地提供服務。」
兒童福利聯盟組織發展處處長 黃韻璇：「佇腦神經科學內底其實攏有，囡仔腦部神經發
育，會因為受著拍佮罵著驚，造成學習較慢。」
兒童福利聯盟表示，根據一份統計，有七成的民眾，會一直想起細漢予爸母拍、無歡喜的
過程。也強調這是國際趨勢，日本、韓國佇三、四年前就已經修法，將懲戒兩字對法律當
中提掉矣。所以怹鼓勵爸母，用正面教育來教囝，予囡仔佇充滿愛佮自信的環境大漢。
記者 鄭亞宣 謝季潾 臺北報導
唐嘉良/編輯