公視新聞網 https://news.pts.org.tw/article/727308
民間欲辦台語政策會議 招中央參加、交流意見
發布時間：2024-12-04 19:15 更新時間：2024-12-04 20:00
https://www.youtube.com/watch?v=NrA71BNrTgM
自7月至10月底，文化部等單位有辦「國家語言發展會議」分區論壇和正式大會，雖然有
討論臺語政策推sak的現狀，但是濟濟民間的臺語推廣團體認為，這个會議推sak臺語政策
的力頭無夠，所致in決定欲佇12/22辦一个「全國台語政策民間會議」，毋但會邀請中央
部會參加，嘛會開放民眾報名，希望這个會議通成做民間佮政府之間交換政策想法的平台
。（此則新聞標題、導言、內文皆為臺語文。）
就算文化部有舉辦幾落場的「國家語言發展會議」，來討論臺語政策推sak的現狀，毋過
有濟民間的臺語推廣團體認為，這个會議推sak臺語政策的力頭無夠。in決定佇12/22欲辦
一个「全國台語政策民間會議」，毋但會邀請中央部會來參加，嘛會開放民眾報名，希望
這个會議通成做民間佮政府之間交換想法的平台。
今年7月到10月由文化部、原民會、客委會等等單位舉辦的國家語言發展會議，討論國家
語言發展法施行了後，國家語言的發展狀況。因為臺語無中央層級的主管機關，濟濟臺語
團體認為，會議對臺語議題討論的深度無夠，決定欲佇12/22由民間團體合作舉辦頭一屆
的「全國台語政策民間會議」。
臺語政策推動聯盟召集人許慧盈表示：「臺語就是寄佇咧文化部的一个科內面、幾个仔人
按呢，譬如講人嘛無夠、資源攏無夠。這過去咱就是一直講想欲來反省這件代誌、想欲檢
討，政府可能想欲做，嘛毋知影按怎起頭。」
民團表示，臺語目前欠缺中央主管機關，無像原住民語有原民會、客語有客委會。這改「
全國臺語政策民間會議」的主辦團體之一——「台灣台語路協會」指出，in長期爭取全臺
語教學的臺語學校，通維持臺語家庭囡仔的語言環境，但是因為無迒部會的資源來整體支
持，是真oh sak。台灣台語路的協會理事長董力玄表示：「親像文化部已經開始有注意著
這塊，有臺語家庭的相關政策sak出來，但是教育部這爿囥佇臺語的資源猶是足少的，咱
若是無用臺語來做教學語言的學校，按呢這个語言是無可能救會活的。」
除了臺語囡仔的教育問題，會議也會針對臺語轉型正義、臺語教育檢討這寡面向，來檢討
現行的臺語政策。民間團體會邀請文化部、教育部等等中央部會參與，也開放民眾報名參
加，按算拜五（12/6）開放報名，in希望這个活動通成做民間佮政府之間交流臺語政策想
法的平台。
盧元媜/編輯