公視新聞網 https://news.pts.org.tw/article/727789
"阮兜講台語"活動 彰化台語家庭拚傳承母語
發布時間：2024-12-07 19:15 更新時間：2024-12-07 19:42
楊舒晴 / 彰化報導
https://www.youtube.com/watch?v=HL4f9Q9HeaM
講母語對家庭開始，關懷文教基金會，佇彰化台語文創意園區，舉辦「阮兜講台語」的活
動，邀請台語家庭，來分享學台語的過程佮心得，現場也有臺語市仔、囡仔歌跳舞的活動
，予民眾那tshit-thô那學台語，落實台語生活化的目標。（這則新聞標題、前言、內文
為臺語文。）
「我講摒掃，來摒掃，提掃帚來摒掃。」
輕鬆趣味的囡仔歌跳舞活動，台跤的囡仔人攏跳甲真歡喜，閣有臺語市仔，鬥圖過關、動
手DIY，腥臊的活動，欲予民眾那耍那學臺語
參加的囡仔：「冊内底有足濟圖的，有甜料、有鹿仔、閣有鳥仔。」
家長李先生：「in設計用一張圖拗拗咧，會當做一本細本的冊，內底閣有白話字、閣有台
語文按呢，對囡仔來講會當接觸著無仝款的語文。」
為著實踐用台語過日子的目標、提升民眾的語言意識，關懷文教基金會，佇台語文創意園
區，舉辦阮兜講台語的活動，除了有各種的台語擔仔位，閣邀請台語家庭來開講，分享學
台語的點點滴滴
台語家庭囡仔：「我等下上台欲講分享一个台語笑詼，（你準備偌久的時間)我準備一個
月。」
台語家庭家長辛小姐：「因為我本身的母語就是台語，所以我感覺我的囡仔，理所當然應
該愛會曉講台語，就是開始佇網路揣資源，開始組織共學團，開始營造台語的環境。」
關懷文教基金會董事長周清玉：「若序大人有要緊講咱的台語，予囡仔有機會聽，逐家攏
繼續講，我想咱的台語一定會當閣恢復起來。」
關懷文教基金會對三、四年前就開始鼓勵民眾佇厝內講母語，目前已經有五百外个台語友
善家庭，文化部嘛對今年開始實施台語家庭計畫，基金會表示，透過民間佮官方同齊拍拚
，相信會當予台語家庭開枝散葉，愈來愈大葩尾。
張曼亭/編輯