公視新聞網 https://news.pts.org.tw/article/728012
公廣集團參工研院合作 推出AI手語氣象主播【涉己新聞】
發布時間：2024-12-09 19:15 更新時間：2024-12-09 20:56
呂尚儒 莊浚佑 / 採訪報導
https://www.youtube.com/watch?v=rbtud9Wp2_s
這幾年AI科技用佇咧咱生活中真濟所在，為著提升資訊平權，予聽障朋友通佇上緊的時間
內，知影重要的資訊，台灣公廣集團佮工研院合作，欲推出「AI 手語氣象主播」，先對
氣象新聞開始做，予聽障朋友通知影上新的天氣變化，甚至是重大天災，拍算上緊明年下
半年，就會佇台灣公廣集團下底5个電視台推出這項AI手語主播的服務。（此則新聞標題
、導言、內文皆為臺語文。）
AI虛擬手語氣象主播講：「氣象署預報受風颱影響，高雄屏東地區會有局部短暫雷陣雨。
」
主播用臺灣手語比予聽障朋友知影上新的天氣預報，這是臺灣公廣集團佮工業技術研究院
合作、欲推出的「AI手語主播」，向望先對氣象開始做，予聽障朋友通佇上緊的時間內，
對電視新聞知影天氣變化、風颱、地動上新的消息。聾人協會表示，濟濟聽障朋友攏真期
待這項促進資訊平權的公共服務。
中華民國聾人協會理事長黃淑芬表示：「咧電視方面，若是雄雄發生重大事件揣無一寡協
助，這馬(若)有AI手語通馬上咧第一時間共這个資訊發生的代誌，予阮會使了解，所以比
較起來我感覺有影是足大的進步。」
工研院運用公視的手語新聞做資料庫，來訓練AI手語主播，只要共文字拍起去電腦，就通
隨翻譯做手語、出現影像，毋過技術人員表示這个過程真無簡單，手勢、關節若有小可仔
精差，手語的意思就會完全無仝。
工研院技術經理李雅文講：「臺灣比較直一寡，伊其實是表示人，若是你咧比臺灣應該愛
較斜一寡，咧辨識的部份，阮會使用前後文的關係，去確定這个字代表的意義是啥物。」
臺灣公廣集團董事長表示，AI手語氣象主播，拍算上緊對明年下半年開始，總共5个電視
台，包括公視、台語台、客家台，原民台和華視，通為聽障朋友提供服務。
臺灣公共廣播電視集團董事長胡元輝表示：「若是順利，應該咧明年下半年就通上電視頻
道，希望講像這款的公共服務的事項，通透過像工研院的合作，繼續對氣象向外延伸。」
臺灣公廣集團和工研院初9佇記者會頂頭簽署合作備忘錄，向望AI科技的進步，通為聽障
朋友建立閣較友善的媒體環境，嘛期待未來會當共AI手語應用咧協助防災、救難。
曹詠涵/編輯