公視新聞網 https://news.pts.org.tw/article/728590
注射筒當做tshit-thô物 醫師：烏白耍恐驚致蜂岫癰
發布時間：2024-12-12 19:15 更新時間：2024-12-12 22:39
https://www.youtube.com/watch?v=gkwrfMyalxE
前一陣仔中國彼爿咧流行的tshit-thô物仔「塑膠刀」，傳到臺灣校園內。最近，中國閣
有一種新的tshit-thô物仔，比進前的塑膠刀閣較危險，是一種模仿醫生注射的物件，閣
有佮1枝注射筒。就有醫生提醒，若是烏白耍，共注射筒注入去咱人的身驅內，可能會有
蜂岫癰的風險。（新聞標題、導言及內文皆為臺語文）
提棉仔共尪仔消毒，紲落來提出這枝危險的注射筒，對尻川注空氣落去，尪仔就若像生
thiāu仔的形，一粒一粒，這是最近佇中國國小校園咧流行的tshit-thô物仔。北部的國
小校長表示，雖然猶未傳入來到臺灣的校園，毋過怹最近真骨力佇校園進行宣導，避免產
生風險。
臺北市大佳國小校長 林光媚：「其實像進前的塑膠刀佮這改的空氣針，其實阮逐改看著
新聞，知影有囡仔愛耍這項物件，阮就會利用兒童朝會，較緊共囡仔宣導。」
針對這款通注射的tshit-thô物仔，台大醫生表示，這種空氣注到囡仔身體，雖然量真細
，袂去影響到性命。毋過，若針頭無清氣，是會有蜂岫癰的風險。
臺大醫院小兒部醫師 楊永立：「伊這針頭一定無清氣，所以就實務來講，伊局部蜂岫癰
感染的風險，猶是較懸一寡。」
像這款危險的tshit-thô物仔，塑膠刀、蠟皮糖、空氣針，衛福部表示，這寡tshit-thô
物仔本身有可能有塑化劑超標的風險，提醒家長愛特別注意，千萬毋通予囡仔去磕著來路
不明的tshit-thô物。另外，教育部嘛表示，已經通報地方政府佮校園愛進行宣導，予囡
仔避免去接觸這款危險的tshit-thô物仔。
記者 鄭亞宣 許猛捷 臺北報導
唐嘉良/編輯