公視新聞網 https://news.pts.org.tw/article/729087
原民會復振平埔族文化 臺南辦展覽呈現成果
發布時間：2024-12-16 19:15 更新時間：2024-12-16 20:49
李晨宇 / 採訪報導
https://www.youtube.com/watch?v=AC1YYeMawD4
原民會佇推sak「平埔族群聚落活力計畫」，欲來復振平埔族群文化，今年邀請各地頭11
个部落，來臺南蕭壠文化園區，展現in這幾冬拍拚的成果，其中內面嘛有四个聚落得著今
年績優獎的肯定，嘛參逐家互相交流分享經驗。（此則新聞標題、導言、內文皆為臺語文
。）
來自宜蘭噶瑪蘭用舞蹈跳出in對家己的自信，閣邀請民眾鬥陣加入，體驗祈福儀式。平埔
族群聚落活力計畫成果展，今年徙來臺南舉辦，計總11个聚落，展現in的文化復振成果。
比論講高雄溝坪聚落對研究，走揣著早前序大用現有的植物咧做掃帚，花蓮里行聚落，是
透過計畫才真正理解In對佗位來，另外得著績優獎的，猶閣有新竹 竹塹社聚落佮高雄橫
山聚落。
花蓮縣里行聚落理事長張咖內講：「阮去翻足濟系譜60幾个家族，共所有的系譜全部調查
完整。然後阮透過量化佮質化的分析，阮才發現平埔族群佇聚落內面比例有七八成以上。
」
高雄市西拉雅族溝坪聚落志工何秋菊講：「阮有去調查著阮遮一系列的掃帚，所以阮就做
掃帚的復振，共彼掃帚的工藝閣揣轉來。」
原民會推sak這項復振計畫已經十冬矣，in透過家族耆老的訪談、文物普查，一步一步共
族人箍倚來，上大的向望就是，共自本的文化揣倒轉嘛傳承落去。親像眼前的袋仔，予人
料想袂夠是用弓蕉絲落去做，面對技藝失傳的危機，in嘛拚勢保護這項文化資產。
噶瑪蘭族奇立板聚落理事長潘子淦表示：「往過咱無網仔攏用弓蕉絲做的，所以咱就是用
弓蕉絲落去做網仔咧掠魚仔，後來才落去做牽罟，較早牽罟阮遐上時行差不多閣有兩百幾
座。」
平埔族群聚落活力計畫共同主持人段洪坤講：「遮的聚落對以前認為家己是平埔族，到這
陣足清楚知影是啥物族，嘛會使足驕傲的共逐家講家己的文化，而且會使傳承落去，去陪
伴學生囡仔，部落內面的青年傳承。」
計畫主持人講，in重視家己的族群，希望提出文化特色來得著社會的肯定，嘛希望國家趕
緊促進各族群的民族認定。
曹詠涵/編輯