公視新聞網 https://news.pts.org.tw/article/729493
「小紅書」有人賣翠玉白菜 咱故宮提告討賠
發布時間：2024-12-18 19:15 更新時間：2024-12-19 12:51
https://www.youtube.com/watch?v=y9zUqLxjyog
立法院教育文化委員會今仔日（12/18）審查明年度故宮博物院預算的時，有立委指出，
佇咧小紅書等中國社群平台，有假口座假影做故宮官方口座，咧賣故宮的周邊商品，可能
影響故宮的收益佮形象。故宮表示，目前當咧調查對方賣的商品是對佗位來的，對方冒名
詐姓也已經透過中國的法院提起訴訟，要求假口座愛關起來、而且愛賠償。（此則新聞標
題、導言、內文皆為臺語文。）
予人號做故宮三寶之一的翠玉白菜，就算是上班日，猶是唌袂少民眾來看。但是有立委發
現，佇咧「小紅書」這寡中國社群平台，有假口座使用故宮的名義咧賣翠玉白菜這寡故宮
展品的周邊商品，就連拄出版的2025曆日也有咧賣。立法委員葛如鈞表示：「有一个『台
北故宮交流中心』佇咧賣故宮文物的資料，閣有授權、閣得著藍勾勾官方驗證，等於是假
做故宮賣文物的授權。這款情況若愈來愈嚴重，當然就會影響故宮的本身的收益，趁錢的
攏是別人，開錢的攏是咱，按呢袂使。」
點開這寡假的故宮口座，毋但咧賣商品，閣有一一紹介展覽品，假做若像是真的官方口座
仝款。故宮表示，目前猶無清楚對方是賣的產品是仿的、抑是透過管道買故宮的正版商品
提去遐賣，這部份當咧查證。國立故宮博物院行銷業務處處長—王耀鋒表示：「阮想辦法
欲去共冊買轉來，來檢視講這是毋是阮的產品，抑是講伊閣去仿冒的，用臺北故宮的名義
來對外宣傳，阮也是感覺足頭疼，抑毋過這个部份阮已經有採取法律的手段，要求對方的
廠商愛賠償。」
故宮表示，怹上早對2021年7月開始，就發現中國社群平台頂面，有人咧用故宮的名義經
營口座。故宮講當咧透過法律手段，佇中國的法院提起訴訟，要求對方共口座關起來，冒
名詐騙的部份也要求賠償，目前相關的訴訟當咧進行，猶咧等待判決結果。
記者 郭柏均 林郁凱 台北報導
盧元媜/編輯