公視新聞網 https://news.pts.org.tw/article/729503
柴山軍事碉堡予人噴漆 2个21歲嫌犯落網
發布時間：2024-12-18 19:15 更新時間：2024-12-19 12:48
https://www.youtube.com/watch?v=hT3iYiOSjuw
高雄柴山西海岸步道有一搭軍事碉堡，予壽山巡查員發現予人烏白噴漆畫圖，警察追查三
禮拜後，發現是兩个21歲的查埔人，趁無人時陣，紮一袋噴漆來破壞碉堡外觀。民眾認為
這款行為真無公德心，這馬兩个嫌犯也予掠，移送法辦。（此則新聞標題、導言、內文皆
為臺語文。）
行柴山步道來到上倚近海的西海岸，遮就是予人號做「柴山阿朗壹」的神祕所在，想袂到
邊仔這个七十冬歷史的軍事碉堡，予人噴甲五花十色，除了有烏色噴漆畫的各種圖案，嘛
用彩色噴漆寫英文字佮「我愛高雄」，來高雄的觀光客看著知名景點予破壞，嘛不止仔受
氣，表示「教歹囡仔大細」、「咱佇遮tshit-thô的時陣，伊予咱是一種真美麗的景色，
但是因為你的行為破壞這个環境」、「愛予伊處份一下，干焦罰錢無夠，愛有警告的作用
，無逐家攏會學」、「遮爾媠的風景，你共伊畫甲按呢足歹看，足無彩」。
壽山國家公園的巡查員佇11月底巡邏時，就發現碉堡予人噴漆，警方去調出柴山百外支監
視器，發現有兩个查埔人，對轎車落車，閣紮一袋物件行入去碉堡，真有嫌疑，頂禮拜就
佇桃園、高雄掠著這兩个21歲的查埔，佇其中一人厝內底，嘛揣著7罐噴漆罐仔，兩个少
年人攏移送法辦。
國家自然公園管理處副處長—黃淑菁表示：「因為碉堡伊有原本的功能佮原本的模樣，這
馬目前予人佇面頂烏白亂皂，紲落阮會處理予伊恢復原本的模樣。」鼓山分局嘛提醒，雖
罔碉堡目前是廢棄，毋過烏白亂皂是破壞國家自然公園設施的行為，違反國家公園法佮毀
損罪，毋但愛罰3000箍，上重閣會判兩年的有期徒刑。
記者 邱紹揚 高雄報導
盧元媜/編輯