公視新聞網 https://news.pts.org.tw/article/729967
冬節大團圓 母語團體辦活動挲圓仔、講典故
發布時間：2024-12-21 19:15 更新時間：2024-12-21 19:46
張君豪 / 新竹報導
https://www.youtube.com/watch?v=tWc_bIy2eck
拜六是冬節，嘛有人講冬節是「小過年」，依照民俗，這工逐家攏會食圓仔，代表團圓的
意思，新竹母語團體就招逐家，除了用台語講冬節的故事，閣安排動手挲圓仔活動，用趣
味的方式予囡仔自然來接觸台語。（這則新聞標題、前言、內文為臺語文。）
「冬節圓，挲圓圓，圓圓趁大錢。」
那唱圓仔歌那跳舞，逐家攏笑甲真歡喜，嘛趁機會講冬節的故事、解說冬節是一年當中、
日頭最短、暗暝上長的一日、予囡仔知。
除了唱歌跳舞、講台語故事，現場閣有挲圓仔活動，無論大人囡仔逐家攏耍甲笑咍咍。
參加民眾：「予(囡仔)體驗為啥物，這個節日愛挲圓仔，嘛予in動手做，了按怎挲圓仔，
予in知影這款趣味。」
參加民眾：「予囡仔過臺灣的節日。」
新竹母語團體特別佇冬節，招逐家做伙來動手挲圓仔，另外閣煮鹹佮甜兩種無仝口味的圓
仔予逐家食。
新竹母語囡仔窟成員Mono：「因為這馬社會較少這款傳統的物件，所以阮就想講會當用這
活動，共這(挲圓仔)傳統的例，和一寡活動繼續傳落去，無若是咧厝內，嘛罕得有這(挲
圓仔)的機會。」
民眾沈雪芳：「阮的傳統就是暗時，冬節進前一暗食鹹圓仔，隔工冬節彼早起就食甜圓仔
。」
冬節團圓食冬節圓，食煞就加一歲，傳統佇這工也愛煮圓仔湯拜祖先、拜神明，「謝冬」
感謝規年迵天的保庇。透透過活動、予囡仔那耍那綴咧講台語，也予逐家感受過節的氣氛
。
張曼亭/編輯