公視新聞網 https://news.pts.org.tw/article/730027
全國台語政策民間會議 提三項訴求復振台語
發布時間：2024-12-22 19:15 更新時間：2024-12-22 20:28
鄭亞宣 許猛捷／臺北報導
https://www.youtube.com/watch?v=KMY6qTfC1f4
第一屆的「全國台語政策民間會議」起鼓。包括政府官員、民間團體佮台語學者攏來參加
。主辦團體「台語政策推動聯盟」提出三項訴求：第一、要求政府成立台語的專職單位。
第二、推動台語成做地方通用語言。第三、推動台語成做學校教學語言。期待政府佮民間
合作，台語復振大成功。（此則新聞標題、導言、內文皆為臺語文。）
第一屆全國台語政策民間會議禮拜日舉辦，有濟濟關心台語發展的民眾來參加，希望推動
台語正常化，也呼籲中央、地方政府愛成立台語相關的專職單位。
國家文化藝術基金會董事長，向陽表示：「大多數的人使用台語，(煞)無一个專責的部會
。所以民間提出愛有台語復振委員會，我完全贊成。」
台文系教授許慧如指出，佇1915年、台灣有8成的人、母語是台語，目前政府的本土語言
政策傷過強調文化佮傳承，語言脫離日常生活，因為錯誤的政策，予華語、英語變做共通
語，台語、客語、原住民語予人囥佇本土語。伊認為應該愛調整過來，共台語、華語變做
台灣的共通語，客語、原住民語囥佇本土語言課程，共英語改做重要外語。按呢 !台語就
有法度恢復佇日常生活使用。
臺師大台文所教授，許慧如表示：「客話佮原住民的語言是族群語言，但是台語是通用語
，所以台語毋是講佗一个族群的人講的語言，應該是台灣過去，中文來進前，大部份台灣
人講的語言。而且袂使閣想欲講，這寡恁攏本土語，所以恁就攏做仝款的代誌，恁就攏佇
課本內面就好。」
許慧如嘛表示，本土語言政策、目前干焦文化部、教育部咧推動，in認為其他政府部門嘛
愛綴咧重視。台語政策推動聯盟講，一工的討論只是頭一步，紲落來會用實際行動，來落
實台語政策。予台語的復振變做目標。
陳怡臻/編輯