我是對二冬前開始信原始/早期佛教的
讀阿含經
因為彼當陣我飼十幾年的老狗往生矣
我足愛伊
非常痛苦
就接觸著阿含經
若這陣我已經知影當初時艱苦的原因矣
因為貪愛
是按怎我會遮愛伊？
因為伊足乖嘛足巧
簡單講：伊的表現完全順我的意
若共世間的代誌簡單分做兩類
1.順我意的-產生貪愛
2.無順我意的-產生瞋恨
伊就是1
等於順我意十幾年
所以我逐工佮伊耍
愈來愈愛
落尾果然親像佛祖講的
愛的本質是苦
所以伊往生以後
我的貪愛無法度閣滿足矣
就艱苦矣
有偌愛就有偌艱苦
後來我共想
若伊在生的時攏無順我意
磕袂著就共我咬
共我吠
我敢閣會遮毋甘？
攏是仝一隻狗
因為順我意 我愛
無順我意 我討厭
證明自頭到尾就是我家己咧愛佮恨的
客觀來講
伊已經相當人的八十幾歲矣
閣著癌
本來就差不多矣
往生對伊來講顛倒是解脫
後世人有機會免閣做狗矣
今世老病的痛苦嘛結束矣
我應該為伊歡喜才著
結論：
自頭到尾
當初時對伊的愛佮毋甘
其實攏是家己想的
參考看覓