公視新聞網 https://news.pts.org.tw/article/731647
國寶級歌仔戲保存者 92歲藝師陳剩昨昏過身
發布時間：2025-01-01 19:15 更新時間：2025-01-02 08:29
呂尚儒 莊浚佑 / 採訪報導
https://www.youtube.com/watch?v=Mf6ZVMjei7o
國寶級的歌仔戲藝師——陳剩，是台北市歌仔戲的保存者，伊佇咧12/31過身，食到92歲
。陳剩在生做生出名，真注重古路戲，退休以後拍拚傳承歌仔戲，廖瓊枝歌仔戲文教基金
會佇陳剩在生時，用口述講戲、劇本採集等等，來保存伊腹內的經典戲齣佮技藝，嘛有拍
紀錄片，拍算會佇今年完成。（此則新聞標題、導言、內文皆為臺語文。）
臺灣歌仔戲國寶藝師——陳剩，佇2024/12/31過身，享壽92歲。陳剩在生，做小生出名，
注重古路戲。退休了後、拍傳承。廖瓊枝歌仔戲文教基金會佇陳剩在生時，有透過口傳講
戲、劇本採集，欲替陳剩藝師拍一支紀錄片，按算今年就會完成。
陳剩共一生攏奉獻予歌仔戲，認為學戲、做戲攏著認真，佇咧2024年最後一日，陳剩辭世
，食到92歲。伊曾講：「學習就是咱的根本，所致有當時仔我學戲嘛感覺，我家己會使講
我嘛不止仔認真。」
陳剩1933年佇新北市新莊出世，自細漢就佇養父的戲班「永樂園」大漢，後來予人栽培做
小生。陳剩真注重古路戲，少年時嘛捌佮臺灣第一苦旦廖瓊枝做伙組歌劇團，兩人有70幾
年的交情，咧知影陳剩過身的消息，嘛予伊感覺真悲傷。薪傳歌仔戲劇團演出總監—張孟
逸表示：「逐遍若搪著老藝人無佇咧，廖瓊枝老師就會感覺講，伊哪會使比我較早走，對
我來講，上無有學一齣老師的拿手戲按呢。
廖瓊枝歌仔戲文教基金會表示，咧陳剩老師在生的時，自2022年開始，in用三年的時間，
共陳剩腹內經典戲齣，透過濟濟方式記錄落來，嘛規畫今年完成紀錄片，予社會大眾攏通
認捌陳剩這位臺灣國寶級的藝師。廖瓊枝歌仔戲文教基金會董事長—蔡欣欣表示：「阮
2024年已經其實記錄片嘛拍欲一年矣，阮基金會嘛佇咧爭取講，敢通共老師伊口述劇本《
三藏出世》遮的物件、包括讀劇，規个整理出版。」另外，文化部嘛會頒旌揚狀，紀念伊
的貢獻。
盧元媜/編輯