公視新聞網 https://news.pts.org.tw/article/732121
赤崁樓海神廟咧整修 工程圍籬畫24幅小封神
發布時間：2025-01-04 19:15 更新時間：2025-01-04 19:41
https://www.youtube.com/watch?v=PFsB3SmwyQA
李晨宇 / 臺南報導
國定古蹟赤崁樓-海神廟這陣當咧修復期間，臺南市文化局特別邀請藝術家，佇鐵鉼圍籬
頂面，畫24幅小封神的故事圖樣。初四閣辦臺語導覽，邀請布袋戲團來介紹，欲予民眾認
捌府城的信仰文化，嘛予古蹟有一个新風貌。（這則新聞標題、前言、內文為臺語文。）
行入文昌閣的入口，有一幅魁星爺咧用臺語食飽未共遊客拍招呼，邊仔猶閣有相連紲24幅
圖，咧講一段府城宮廟神明群仙大亂鬥的故事。詳細看這畫甲真幼路的圖，攏是畫佇當咧
修復的赤崁樓海神廟鐵片頂面，這是藝術家蔡濰任的創作，伊用作家許丙丁寫的小封神來
做題材，共故事內容轉做圖像。
藝術家蔡濰任：「作品創作就是延續許丙丁老師概念，伊共咱平常時定看著的神明圖樣，
共囥入故事內面，你就會發覺原來遮的故事遮趣味，因為有當時仔咱咧拜神，毋過煞毋知
影內底的神明發生啥物代誌。」
雖然這陣工程猶未完成，毋過文化局專工先辦全臺語導覽，閣倩蘇俊穎掌中木偶戲團結合
布袋戲，予民眾先來體驗百冬古蹟的新風貌。
臺南市文化局古蹟營運科長李雪慈：「請藝術家來佇施工圍籬的頂懸，進行藝術創作，遮
的藝術創作，表達咱臺南的歷史文化民俗風情。」
蘇俊穎掌中木偶戲團團長蘇俊穎：「一來予逐家趣味好笑，閣再來予咱逐家體會講，較早
的人面對信仰面對文化，in用啥物的態度去共表現。」
逐幅圖閣有臺語講解的QRCODE，予鄉親一改聽予夠氣。
民眾：「看這bàng-gà來看笑咍咍，到尾仔倒轉來對心內認真來思考，咱人佮神明之間
的看法。」
這回赤崁樓閬30冬才閣整修，主要因為長期使用佮環境氣候的影響，致使建物有寡損蕩。
文化局講，未來民眾來遮通看著17世紀到今的歷史文化，嘛通進一步來認捌府城的文學。
張曼亭/編輯