公視新聞網 https://news.pts.org.tw/article/733471
安平予土地公「揹八字」 特殊祈福上千人登記
發布時間：2025-01-13 19:15 更新時間：2025-01-13 19:38
李晨宇 / 採訪報導
https://www.youtube.com/watch?v=yz-iCioH4vU
春節年假欲到矣，濟濟宮廟攏提早予信徒點燈。佇臺南安平的金龍殿，廟方有一个全國獨
一無二的儀式，就是開放信徒，共生辰八字放佇神尊的繡龍荷包內，予神明「揹八字」保
平安。若歸仁仁壽宮，是特別設「藥師燈」，這六年來燈數已經增加12倍。 （此則新聞
標題、導言、內文皆為臺語文。）
金龍殿福德正神神尊胸坎的繡龍荷包予喙鬍掩牢咧，除了科儀以外，無，平常時是袂使磕
的，原來內底囥的是濟濟信徒的生辰八字，三冬才開放一改，這成做全臺灣真特殊「揹八
字」賜平安的文化。廟方講，今年開放到今有上千人相爭來登記。
民眾講：「來遮的時陣拄仔好有咧講三冬一斗，感覺這嘛足有意義的，因為畢竟咱佇遮攏
祈求咱土地公，共咱鬥相共攏有鬥相共著。」
安平全臺金龍殿主委陳展川講：「彼陣日本咧統治，咱臺灣足遮人予人抾去做軍夫，做軍
夫攏有去無倒轉來，逐家攏感覺真煩惱，求助無門的時陣只好來拜神，講嘛是講真玄，因
為有揹的攏平安順利倒轉來。」
這个文化對日本時代開始流傳，上早廟方干焦予軍眷報名，閣來是SARS流行的時陣。廟方
指出，後來經過請示，才予一般民眾來求神明揹八字消災。若另外一爿傳統的點燈，嘛真
濟人咧登記，像歸仁仁壽宮，主神保生大帝，廟方設「藥師燈」，予人祈求身體健康，這
六冬來燈數增加12倍。
歸仁仁壽宮廟方人員表示：「佇民國103年元旦就開始增設藥師燈，當時今仔設的時陣干
焦幾百燈爾，這馬每一冬攏咧成長，到舊年1008燈全部攏滿，阮今年共增加到1308燈。」
無論是點燈抑是揹八字，攏是祈求神明降福保庇，予規年迵天攏順序，若神尊替信眾「揹
八字」，嘛表示對眾生的慈悲。
曹詠涵/編輯