公視新聞網 https://news.pts.org.tw/article/734323
台語家庭oh經營 板橋台語共學團交流經驗
發布時間：2025-01-18 19:15 更新時間：2025-01-18 19:43
郭柏均 林郁凱 / 新北報導
https://www.youtube.com/watch?v=VZhQ07Akclg
有一个踮新北市板橋的台語共學團，到今已經成立第5年，有幾十个台語家庭，每個月攏
會有聚會，毋但予台語家庭的囡仔，有交台語囡仔伴的機會，也予家長互相交流，按怎經
營一个台語家庭。（這則新聞標題、前言、內文為臺語文。）
大人囡仔唱歌：「我佇遮真歡喜，我佇遐嘛歡喜，我佇任何所在攏嘛真歡喜，歡喜。」
大人佇台頂，tshuā囡仔鬥陣唱台語囡仔歌。
「來，線這，猶閣有彼个黏布。」
現場也用台語，tshuā囡仔共紙拗做紙砲，這是母語團體舉辦的共學活動，現場有濟濟台
語家庭的大人囡仔參與，用台語交流，真濟人攏感覺真心適。
台語家庭家長李先生：「就想講自細漢就有台語的環境，嘛揣一寡囡仔姊、囡仔兄，會當
做囡仔伴。」
台語家庭家長游小姐：「阮細漢就是攏講台語，佮阿公阿媽嘛攏講台語，就是足四常，毋
過囡仔一離開厝裡，去外口，就攏接觸攏華語的世界矣。」
一寡家長有心欲經營一个台語家庭，但是定拄著困難，親像毋知濟濟華語詞的台語通按怎
講、抑是按怎面對親情朋友對台語家庭的質疑。母語團體希望透過共學團，毋但予台語家
庭的囡仔有交台語朋友的機會，家長之間也通互相交流。
共學團發起人/台語路podcast台長阿蓉：「伊若是想欲對囡仔講台語，抑毋過囡仔可能較
細漢、抑是較大漢、抑是已經傷大漢矣，伊煩惱講囡仔會毋願接受的時陣，會使按怎來做
。」
這个共學團對2020年成立，對一開始只有零星幾个台語家庭，到今經過5年，已經有20~30
組家庭，捷來參加台語共學團聚會。發起人之一阿蓉希望，透過這个共學團，通予台語家
庭的家長，有機會分享經營台語家庭的經驗，予台語家庭的團體閣較活潑發展。
張曼亭/編輯