公視新聞網 https://news.pts.org.tw/article/735388
高雄海thē湖有人亂擲魚頭 汙染水質、海thē變少
發布時間：2025-01-24 19:15 更新時間：2025-01-24 23:12
https://www.youtube.com/watch?v=pH9SQG2V8Qg
高雄林園的湳仔地公園，有蓋出名的海thē湖。這陣仔出現超過6萬隻的「顛倒海thē」
，毋過，這兩工煞發生，有人烏白擲10外粒的烏魚頭入去湖內底，汙染著水質。林園愛鄉
協會就講，原底湖邊攏是滿滿的海thē，這馬數量是減少真濟。（新聞標題、導言及內文
皆為臺語文）
協會人員頂禮拜猶看著岸邊顛倒海thē排甲pí-pí，毋過這兩工煞雄雄變按呢，疏疏無
幾隻。林園愛鄉協會人員煩惱，敢是頂工予人擲10外粒的烏魚頭佇遮，規个水面浮真濟油
，汙染著水質，彼日雖罔協會志工緊通報市府，公園處嘛隨派人將魚頭清掉，毋過海thē
的量猶是有變較少。
林園愛鄉協會志工 曾文煌：「就是烏仔魚嘛，彼个油真濟，油伊會浮佇頂懸。因為這海
thē是靠光合作用咧生存的，油加減攏會共影響著。較早攏佇岸邊較濟，自從按呢奇怪，
佇岸邊就較少看著海thē。」
協會表示，公園的水源，攏是靠附近養殖戶排出來的水來維持，所以水質、水量攏無穩定
，毋過生態誠好，雖然湳仔地公園有禁止民眾提物件來飼魚仔，過去也捌有人無守規矩。
民眾：「提彼麭的彼个皮無，彼个皮無愛食，擲擲落予食按呢。其實伊是一个善心，毋過
按呢是無合生態原則的。」
遊客：「這是誠特別的、誠罕有的，應該愛予閣較濟人知影，嘛愛予閣較濟人去保護伊，
維護這个環境。」
這个寒天，協會頂個月才調查，海thē數量大約六萬隻，是舊年的三倍。協會表示，可能
因為今年水量較濟，過年期間可能會有遊客來欣賞海thē生態，愛提醒民眾，烏白飼魚仔
、掠魚仔，按照高雄市公園管理自治條例會當罰1千至6千箍。
記者 許嘉茹 邱紹揚 高雄報導
唐嘉良/編輯