公視新聞網 https://news.pts.org.tw/article/735665
南鯤鯓代天府抽出國運下下籤 經濟、政治搪考驗
發布時間：2025-01-29 19:15 更新時間：2025-01-29 19:48
李晨宇 / 地方報導
https://www.youtube.com/watch?v=4NDLYEA_QQk
正月初一濟濟信衆攏出外行春，各宮廟嘛準備錢母來予逐家一个好彩頭。臺南市的南鯤鯓
代天府今仔日抽出蛇年的國運籤，廟方認為，字面上是下下籤，咱的經濟參政治可能會牽
連著，就愛舊曆六月了後才會沓沓仔變好。（此則新聞標題、內文為臺語文。）
臺南南鯤鯓代天府正月初一抽國運籤，今年抽第二支籤，連紲五个象桮在在，廟方抽出第
54首，雖然佮八年前仝款是「下下籤」，毋過廟方解讀，經濟參政治可能會寡牽連，嘛會
搪著一寡考驗。
南鯤鯓代天府董事陳文賢講：「若以頂半冬來看會較辛苦，籤詩嘛是咧講個人嘛愛去扞，
一重江水一重山，一爿是山一爿是水，你欲行山路抑是行水路攏愛家己撙節。」
南鯤鯓代天府總幹事侯賢名講：「不管按呢咱的國運、民生、經濟，只要透過百姓全國來
努力，咱臺灣的經濟一定是讚的，著毋著？」
廟方講，雖然這支籤看起來無蓋好，毋過各有解讀，IN嘛講對年中開始，經濟會漸漸好起
來，一直到年尾咱的經濟會進前較好。新正年頭，有的廟特別sak出無仝款的錢母，像台
灣府城隍廟特別攢限量666份的66箍錢母，欲予人添財氣；若縣城隍廟是以較少流通的20
箍銀角仔，提著人逐家攏歡頭喜面。
民眾講：「今年拄仔好相蛇，想講有這个活動，所以才對臺北落來討錢母，求一个好財運
按呢。」
臺灣府城隍廟主委郭榮哲表示：「今年(蛇)生肖第六个，排第六，咱用錢的金額來表示這
个意象，想講蛇年會當六六大順。」
正月初一是新年的頭一工，真濟民眾攏趁好天出外行春。眾人祈求新的一冬攏順順利利。
曹詠涵/編輯