公視新聞網 https://news.pts.org.tw/article/736020
2/4─2/9臺北國際冊展 設7特色展區、8主題館
發布時間：2025-02-03 19:15 更新時間：2025-02-03 22:43
https://www.youtube.com/watch?v=uSAo8BF36as
第33屆「台北國際冊展」，明仔載（4）起鼓，欲辦到2/9。今年冊展的主題國是意大利，
攏總有來自29國、國內外504間出版社參與。現場嘛有規畫真濟精彩的主題館，閣有文學
冊區、公民冊區、臺灣尪仔冊館等7个特色展區，希望呈現臺灣多元的出版文化。（新聞
標題、導言及內文皆為臺語文）
過年連假拄結束，臺北世貿一館內底為著欲辦臺北國際冊展，已經無閒tshih-tshih，今
年冊展主題是「閱讀異世界」，今年冊展的主題國是意大利，計共有11个意大利作家來臺
舉辦講座，也會展出60本意大利繪本、30位尪仔冊作品，文化部嘛希望透過活動通予臺灣
民眾體驗意大利的生活風情。
意大利主題國代表 龍博文：「憑阮的想像力，意大利會當為文明做出非常有意義的貢獻
。親像3千年前意大利人，創新的思維產生創造出閣較好的世界。」
文化部長 李遠：「我希望咱透過想像無邊的能力，來予咱這段時間的冊展宣傳，透過各
種無仝方式（推sak）出去。」
今年冊展分做7个特色展區、8个主題館，有文學冊區、公民冊區、臺灣尪仔冊館等等。親
像「公民冊區」，有欲50間獨立出版社、和31个NGO團體合作規畫展覽區，毋但結合流行
走秀的舞台，閣有打造社會運動者常在出現的記者會現場，運用濟濟流行的元素吸引少年
家來踅冊展，希望讀者通佇冊展體驗著議題是按怎出現佇公眾視野。
獨立出版聯盟理事長 陳夏民：「阮希望講，讀冊無遐爾嚴肅，就是足輕鬆的，所以你就
歡歡喜喜入來。」
另外，臺北國際冊展也有袂少出版社規畫台語活動，親像九歌出版社、前衛出版社、玉山
社等等，有規畫袂少台語和臺灣文史講座。長期注心台語出版的前衛出版社也表示，今年
仝款會有臺文冊的講座，希望作者和讀者互動了解出版台語冊趣味代。
前衛出版社主編 鄭清鴻：「咱嘛希望透過按呢活動的設計，會當予咱佇冊展內底，聽著
愈濟人講台語，予較濟台語活動去帶動台語閱讀。」
文化部表示，今年臺北國際冊展有來自29國、國內外504間出版社參與，冊展期間猶未滿
18歲的青少年通免費入場，若是18至22歲有文化幣就通免費參觀，希望鼓勵逐家用實際行
動來支持臺灣出版業。
記者 張佳倪 謝季潾 臺北報導
唐嘉良/編輯