公視新聞網 https://news.pts.org.tw/article/736802
百年傳統9角頭迎天公 寶藏寺老大媽同齊繞境
發布時間：2025-02-07 19:15 更新時間：2025-02-07 23:14
https://www.youtube.com/watch?v=8Rb6CTVKsus
彰化芬園一搭由庄內九个角頭輪流奉祀的天公爐，逐年佇天公生前後，攏會舉辦迎天公的
儀式。除了天公祖的鑾轎，閣會恭請寶藏寺的老大媽，做伙佇庄內繞境，誠鬧熱。（新聞
標題、導言及內文皆為臺語文）
沿路徛家排出香案桌，閣有濟濟民眾綴咧隨香，這是彰化芬園有百年歷史的迎天公活動，
天公祖的鑾轎參地方信仰中心－寶藏寺的老大媽神轎，同齊佇庄內繞境祈福，保庇地方平
安。
民眾：「（綴咧行）十外年，綴天公行啦。」
民眾：「我會來參加是因為，阮先生是芬園這爿的人，進前無綴咧行過，感覺足趣味嘛足
特別的。」
彰化芬園的天公會，是庄內九个角頭輪流服侍天公爐，逐个角頭九年才輪著一擺，欲跋著
爐主更加難得，今年由舊爐主圳墘角交接予八寮角的新任爐主，佇舊曆正月初十這工舉辦
迎天公活動。
乙巳年八寮角天公爐主 林明池：「（今年）是八寮角的同安寮承辦，距離（頂擺）是民
國24年到這陣，拄仔好著阮，拄仔好是（閬）90年。」
乙巳年八寮角天公副爐主 林子瓏：「咱芬園這个地區有較特別。正月初九恭請咱寶藏寺
老大媽，出巡繞境舊的庄頭；初十過爐迎天公爐來新的庄頭，像今年就是著阮八寮角。」
相傳芬園早年因為物資欠缺，移民族群定定發生衝突，也就是漳泉拚，落尾地方成立天公
會，希望維持社會安定和諧，演變到今，迎天公成做地方重要的民俗文化活動，今年陣頭
、隨香客，計共有成千位民眾參加，同齊延續這項有百年傳統的迎天公文化。
記者 楊舒晴 彰化報導
唐嘉良/編輯