公視新聞網 https://news.pts.org.tw/article/737108
沙國11月欲辦第一屆電競奧運 臺灣也會參加
發布時間：2025-02-10 19:15 更新時間：2025-02-10 20:42
洪敏真 賴威佐／高雄報導
https://www.youtube.com/watch?v=HYCWlnbu1BU
今年11月國際奧會和沙烏地阿拉伯奧會合作，欲辦頭一屆的電競奧運會，台灣嘛會組隊比
賽。目前台灣現役的職業選手才兩百个，體育署講今年欲sak類黃金計畫，栽培重點選手
，毋過學者認為，台灣猶需要較全面的的商業制度和職業化市場，才有機會和別國徛起。
（此則新聞標題、內文為臺語文。）
衝衝衝、拍怪、使用武器，正修科大電競系校隊隊員，那拍那修正戰術；幕後的副控室，
同學做導播、OB手、猶閣有音控師，逐家攏無閒tshih-tshih。
正修科大電競三甲謝芮凌講：「逐家攏掠準講，彼電競干焦耍電動爾以後就出來tshit-th
ô，但是電競是有足濟發展，我佇電競是做主持人較濟。」
這幾年電競那來那受歡迎，根據統計，全台成立電競相關科系佮課程的大專院校、高中職
超過200間，現役職業選手兩百外个；今年11月份臺灣嘛會去沙烏地阿拉伯，參加頭一屆
的電競奧運會，比賽三大項目：虛擬運動佮傳統運動模擬遊戲，閣有非運動類傳統電子遊
戲，毋過眼前臺灣的挑戰袂少。
中華民國電子競技運動協會秘書長余錦亮講：「臺灣的商業制度，咱這職業化的市場較無
遐全面，無遐全面來講，今年開始咱遮的職業聯盟，嘛是和東南亞、越南猶閣有澳大利亞
，猶閣有日本合起來，咱這馬佇臺灣咧比賽。」
正修科大電競科技系助理教授胡裕強講：「主要佮韓國、中國比起來，我認為in的人口基
數較濟，這方面的市場嘛較大，政府也好民間企業也好，in較願意去支持這塊。」
學者嘛表示，過去臺灣電競活動傷過注重實體，線頂看直播的觀眾行袂出臺灣市場，閣包
括這幾年袂少外資聚集佇東南亞，影響咱臺灣企業無法度永久投入資源；體育署今年欲
sak類黃金計畫，全力栽培菁英選手，減少人才流失；抑奧運會國手名單，等主辦單位公
布比賽細節項目，咱就當開始組隊揀國手囉！
曹詠涵/編輯