公視新聞網 https://news.pts.org.tw/article/737315
臺南鹽水蜂炮正式啟炮 31校學生拚陣仙拚仙
發布時間：2025-02-11 19:15 更新時間：2025-02-11 20:09
李晨宇 / 採訪報導
https://www.youtube.com/watch?v=z8Gq-9z0QzQ
鹽水蜂仔炮活動正式起鼓，現場也有「大臺南囡仔仙拚仙」拍頭陣，這是臺南市教育局邀
請31間學校的學生，來展現IN所學的傳統技藝。毋但有傳承文化嘛有結合創意的，現場鬧
熱滾滾。（此則新聞標題、內文為臺語文。）
有囡仔跳電音三太子誠有範，嘛有傳統跳鼓陣結合現代生活器具，真有家己的特色。閣有
弄獅等表演，增添現場鬧熱的氣氛，這若像一場嘉年華。臺南市教育局辦「大臺南囡仔仙
拚仙」活動，攏總邀請31間學校，來鹽水武廟廣場展現in所學的功夫，嘛激發學生對本土
民俗技藝的興趣。
臺南市永康區五王國小學生講：「對二年仔開始加入，學的時陣其實拄著足濟困難，但是
後來就沓沓仔克服，足有成就感，家己跳了的時陣。」臺南市鹽水區月津國小學生嘛講：
「有表演獅仔的翻滾獅，閣有獅頭獅尾的交換，閣有兵器的對拍。」
臺南市教育局社會教育科長王曉慧表示：「不只是講予囡仔一个表演的機會，共in普通時
仔所學的遮的傳統藝術文化的內涵，會當呈現予咱所有的民眾看，當然這嘛是一个真重要
的文化傳承。」
活動以創新佮傳承做主題，無論是民俗舞蹈、鼓術佮武術等，囡仔in攏展現對傳統技藝的
熱情，嘛展現創意，替鹽水烽炮活動拍頭陣。另外，佇廟前規kuānn的炮仔吊起來磅，嘛
代表鹽水元宵活動正式登場。神轎嘛相連紲咧繞境，分成5條路線，沿路嘛有住戶出來獻
炮求平安，唌真濟民眾先來感受這款刺激感。
在地居民講：「差不多縛萬捅枝(炮)。（記者問：為啥物欲縛炮獻予關聖帝君？）就是祈
求逐家平安趁錢。」、「阮在地人因為習俗就逐冬攏會來體驗一下，愈炸愈旺按呢。」
活動為期兩暝兩日，會鬧熱到元宵暝，廟方講，欲來參加體驗的民眾定著愛做好防護措施
，嘛強調逐家千萬毋通擋炮，上少愛離炮城五公尺。