公視新聞網 https://news.pts.org.tw/article/737953
國家語言生活節 利用市仔.藝術推廣臺灣母語
發布時間：2025-02-15 19:15 更新時間：2025-02-15 19:41
郭柏均 謝季潾 / 臺北報導
https://www.youtube.com/watch?v=eVsd0GpQXzI
後禮拜五就是世界母語日，文化部佇拜六、禮拜兩工，舉辦「國家語言生活節」，透過市
集、舞台劇、電影、音樂這寡方式，增加臺灣各款母語的能見度。文化部表示，希望予民
眾感受著，咱的環境不只有華語爾爾，閣有各款無仝的國家語言，邀請民眾鬥陣聽母語、
講母語。（這則新聞標題、前言、內文為臺語文。）
「香爐、香爐，媽祖娘娘的香爐。」
台頂演員鬧熱滾滾，由紙風車劇團拍頭陣，為今年的「國家語言生活節」開幕，後禮拜五
就是世界母語日，文化部舉辦「國家語言生活節」，以舞台劇、電影、音樂、甚至台語的
密室逃脫遊戲等等方式，推廣臺灣多元的母語。
文化部長李遠：「你會發現咱攏講華語是因為，自細漢咱的教育是講華語，所以這馬愛恢
復，所有予人打壓的語言，包括台語、客語、原住民語、拄仔講的閩東語，所有予人打壓
的語言，攏成做國家語言。」
生活節也有邀請冊店、出版社、和長期推動台語文的民間團體來擺擔仔，有台語的繪本、
雜誌、小說等，提供民眾學習台語的聽講讀寫。民間團體希望，落實母語生活化，養成平
常時就自然講母語。
李江却台語文教基金會執行長陳豐惠：「目前這个語言權，顯然是失落、無夠，咱若是國
民基本教育，會當共咱的語言是正常化去處理，就是正常的教學節數、正常的師資抑是環
境，按呢的時陣才會當落實講予咱的後一代佇咧生活中，較有可能去佮厝內其他成員去使
用這个語言。」
民間團體呼籲政府，愛對課綱開始做改變，增加母語課程的時數，來推廣母語。兩天的國
家語言生活節，佇臺灣當代文化實驗場舉辦，計共有62場的活動，毋只台語，也展現客語
、原住民語、手語、馬祖話等臺灣多元母語文化。
郭柏均/編輯