浪費9年青春 越做越霉 高鈞賢離無綫 唔使再扮色魔
http://hk.apple.nextmedia.com/entertainment/art/20140911/18861952
現年30歲的首屆香港先生高鈞賢，在無綫捱足9年有名冇利，月入只有$25,000
的他試過被凍薪，近年更越做越霉變二打六，連拍劇非禮阿婆、上節目講痔
瘡都要做，一度令他患上抑鬱症。九年青春流逝不返，高鈞賢決定約滿後北
上賺人仔，昨日最後一天返無綫執包袱，終於唔使再扮色魔。
九年前只有21歲的高鈞賢，由加拿大返港參加首屆香港先生選舉，以大熱姿
態勇奪冠軍，獲司儀鄭裕玲高度讚揚，並跟無綫簽下八年長命約。以為從此
一帆風順的他，怎知越做越霉，由第二男主角淪落到二打六的角色，他昨日
慨嘆說：「我都唔知點解，做咗好多非禮女人角色，喺《寒山潛龍》要非禮
阿婆 ，甚至有節目講生痔瘡，我好唔想去做，但係覺得作為簽咗合約嘅藝
員，做番應份嘅嘢，我都有去做。」多年來被無綫投閒置散，高鈞賢終於決
定約滿後離巢，不再依靠大台有名無實的遮蔭，孤身北上內地發展賺人仔。
■曾獲港男冠軍的高鈞賢近年工作量不多，出席活動時還要配合被魯芬強吻。
■高鈞賢在劇集《寒山潛龍》做配角，飾演老千的他更要非禮阿婆。
中文唔好 監製嫌棄
昨日是高鈞賢在無綫的最後一天，約下午3時許，他駕駛二手波子返公司執包
袱，紙皮箱載滿他九年的回憶，包括粉絲為他拍攝及多年來在無綫拍下的相
片，還有外套、籃球等，同事知道他離去，送了一本TVB周刊給他留念，高鈞
賢還特別買了一份下午茶，品嚐在無綫的最後一餐。
■高鈞賢昨日用紙皮箱帶走fans送的相簿、外套、籃球，還有在無綫買的最
後一份下午茶。
■在無綫越做越霉，高鈞賢曾問家人借錢入股車行，現業績不錯，可以揸二
手波子出入。
問到為甚麼離開大台？高鈞賢說：「喺加拿大睇無綫劇覺得幾過癮，盲舂舂
返嚟做咗香港先生，可以話夢想達成，嗰時好開心，好多人認識我，無綫都
畀一份好吸引合約我，自己感覺好有衝勁，二話不說簽咗八年，即刻同家姐
一齊供樓供車，當時$15,000人工，將軍澳層樓300幾萬，都有少少博。初時
有好多唔同工作，拍劇、節目，之後拍古裝劇《幕後大老爺》做第二男主角
，自己中文水平二年班，要攬住劇本瞓覺，雖然不斷努力，但達唔到監製理
想，好多監製怕咗用我。」
知恥近乎勇的高鈞賢，花錢請教戲老師學演技，雖然自覺有進步，但工作卻
越來越少，他說：「到第五年公司同我講，呢一年差咗啲，所以呢年合約要
凍薪，但要加簽一年，當時人工去到$25,000，自己想喺呢行繼續做，同公司
講唔要求做主角，希望慢慢進步嘗試，公司話OK，所以簽咗呢份約。」怎知
之後幾年公司卻將他投閒置散，他說：「好多街坊問呢排做緊乜？我好想答
佢哋，但答唔到！」
呻藥費貴 唔醫抑鬱
由於要供樓供車供保險，生活壓力令他透不過氣：「嗰時諗係咪真係要繼續
呢？懷疑自己係咪有抑鬱，因為唔敢出去面對人，嗰段時間冇乜工作，每月
咬住得三、四千蚊使，死撐冇同任何人講，我有睇醫生，但每次藥費$1,000
太貴，最後決定自己解決。嗰排冇工開成日打籃球，有次腳傷入院，好深刻
係父母嚟探我，阿爸問我攞銀行戶口睇，我即刻喊咗出嚟，點解畀唔到更好
屋企人，當時戶口剩番五萬蚊。」
高鈞賢為堅持在這行發展，甚麼角色都肯做，問對無綫是否很失望？他說：
「大家timing唔夾！自己畀咗九年時間，公司最尾一年先挽留同加人工，令
我喺好唔開心同惆悵狀態下離開。呢九年雖然有啲時間浪費咗，但畀到我經
驗同經歷， 家30歲選擇呢一步，希望有新開始，之前去咗北京，有幾間
經理人公司都想簽我，其中一間條件唔錯，呢兩個月自由身，享受鬆一口氣
感覺，之後會上北京定居同做嘢，重新出發。」
麥玲玲昨在電視城見到高鈞賢，祝福他有新開始，麥師傅說：「佢屬鼠今年
沖太歲，適宜走動去凍地方，命格今、明年事業有新發展，但小心協調人事。」
人物誌：首位港男冠軍
今年30歲的高鈞賢，05年參加第一屆香港先生選舉，奪得冠軍後加入無綫。
首部拍攝劇集《肥田囍事》，與胡杏兒及許志安合作，但表現未見突出，其
他演出包括《幕後大老爺》、《通天幹探》、《烈火雄心3》、《舞動全城》
、《情人眼裏高一D》等，最近一部播出的劇集為《寒山潛龍》，全屬配角。
語言障礙：陳豪「同朕再check吓」
高鈞賢因在加拿大長大，不擅中文，令到很多導演卻步，然而圈中也不乏中
文和廣東話不佳的藝人，選美出身的苟芸慧和岑麗香更是表表者。
苟芸慧曾於劇集《金枝慾孽貳》飾演公主趙盼，因為廣東話麻麻，事後監製
莊偉健要安排她重新配音。至於在外國讀書回流香港的陳豪亦曾出事，去年
被網友翻舊賬，指他於劇集《帝女花》飾演崇禎皇帝時，一句「同朕再
check吓」的對白，於網上瘋傳，令網民爆笑。
大星走晒：林峯杏兒向北闖
高鈞賢離開合作九年的無綫，決意到內地發展，最近亦有多位藝人離開大台
到內地搵人仔。
林峯
上月約滿，最近內地播映他與周麗淇主演的劇集《衛子夫》，收視不俗，網
上點擊更高達15億，人氣急升連帶片酬也上升，一集酬勞高達50萬人民幣。
胡杏兒
明年中約滿後打算向外闖，看準更大自由度的內地市場，正與內地娛樂公司
聯繫，內地身價約15萬人民幣一集。
楊思琦
今年5月約滿，除為有線主持節目外，亦有到內地登台，密密搵真銀。
港男下落：黃長發轉做會計師
參加香港先生選舉入行的高鈞賢離巢北上發展，而其他的港男發展亦大有不
同。
黃長發
06年港男冠軍，於09年搭上鞋王鄧劍群三奶李姿霆，同年離開娛樂圈，現職
會計師。
黃長興
05年香港先生，奪得最突出表現組別大獎，近年鮮有拍劇，現於北角開設法
國餐廳，12年與圈外女友在法國註冊結婚。
彭罡原（前名彭冠期）
05年奪得香港先生最突出表現個人大獎，拍過四部電視劇，09年全裸參與雲
翔執導的《安非他命》，現已轉行做飲食業當日本菜師傅。
黃文迪
08年參加港男選舉，奪香港小姐眼中最具智慧的香港先生，與呂慧儀結婚，
剛榮升做老竇。
白健恩
10年港男冠軍，於劇集《法網狙擊》中強姦高海寧。曾涉在同志聊天室招攬
生意，事後他發聲明澄清。