細述合作甜酸苦辣　鄭裕玲撩發哥想當年
【on.cc東網專訊】 周潤發在《東網巨星》全新節目《發哥有Say》爆料，指曾情傾70年
代電視劇經典螢幕女友鄭裕玲（DoDo），今日DoDo就在自己主持的電台節目中，大談與發
哥合作趣事！
趕劇攰到同發哥瞓街
DoDo表示跟發哥拍劇的時間最長：「特別係《網中人》，成80集，拍咗9個月，套劇係一
路拍一路出街，我哋真係試過喺條街度瞓。之後套劇好收得，即刻再開劇，《網中人》我
哋做有錢人，但《親情》我做工廠女工，佢做車房仔，嗰套都成80集，但好彩我五十幾集
就『瓜咗』，開心晒，不過都拍咗半年，所以加埋對咗佢一年幾，真係一擘大眼就見到佢
，嗰陣我住廣播道，喺舊TVB附近，所以行過去就返工。」
爆角色不死之謎
她又踢爆發哥愛用方法演技來入戲：「我叫佢做發仔，佢嗰陣用方法演技，《網中人》我
哋做情侶，佢專登買個wallet（錢包），可以擺到相嘅，未開工前我哋就影咗啲親密照，
佢特登叫攝影房晒番幾張2R相擺喺個wallet入面，嗰個係佢平時會用嘅wallet。（有冇暗
喜？）冇諗呢樣嘢啦，嗰陣佳視（佳視電視台）執咗，好彩TVB搵我，任何機會都博到盡
。（所以唔理啲男女私情？）係啦，我從來都唔諗，我冇咁單料銅煲，做嘢還做嘢。不過
見佢用啲咁嘅方法又幾得意，佢嗰陣同陳玉蓮拍拖，我哋仲一齊飲茶。我都有問佢驚唔驚
女朋友唔鍾意，佢就話『因為我哋唔係咁熟，但又要做一pair，一嚟就要拍，所以要代入
。』之後就受歡迎啦！《親情》中間我死咗，觀眾唔鍾意，我仲要上《K-100》解釋同希
望大家繼續支持，所以之後就唔敢再整死我。」
當發哥半個屋企人
DoDo大讚發哥是超級好拍檔：「發仔真係好好人，好照顧拍檔，有一次演《火鳳凰》我哋
喺九龍塘拍外景揸跑車戲，我嗰日唔舒服，但唔敢同導演請假，因為對咗發仔咁耐，好似
半個屋企人，所以同佢講我唔舒服，跟住架車即刻『蓬』一聲開咗去，原來佢車我去藥房
買藥，之後先車返去拍嘢，我驚人誤會，我哋嗰日係喺九龍塘，但只係拍嘢。所以佢好照
顧拍檔，非常唔自私，如果係你嘅戲就唔會搶。」
遺失發哥合照
在節目中DoDo呼籲發哥上她節目受訪：「發仔，大家合作咁耐，你都60歲人，可以想當年
嘅人有幾多，你嗰陣仲未喺荷里活、內地，而係大家仲青春、捱緊嗰陣，所以你可以上嚟
懷緬吓，冇乜幾多人可以做到，希望你可以上嚟，幾點都得，好早都得，跟住放你去行山
兼買餸。（發哥話你依家有黃子華喎？）佢笑住講啫，佢乜都知，乜都有留意，我懷疑佢
依家都喺度聽緊。（你去九龍城撞發哥？）點撞呀？不過多年前我喺西貢拍《男親女愛》
片頭嗰陣真係撞到佢，行姐（陳彥行）當時好開心，我哋有影相，但啲相唔知去晒邊。」
冇發哥聯絡方法
DoDo又表示沒有發哥電話：「得佢fax咋，個fax仲要唔係佢嘅，只係fax到佢經理人。（
用email搵佢？）你覺得佢會有email咩？不過我試過有次喺又一城撞過發嫂，發嫂好熱情
，仲即刻攬住我。」
http://goo.gl/IjF4yn