https://news.pts.org.tw/article/713044
陽明交通大學煏虐待動物？ 有貓死佇籠仔內
發布時間：2024-09-03 19:15 更新時間：2024-09-03 19:34
張君豪 / 地方報導
陽明交通大學新竹校區，傳出若親像是虐待動物的事件，有民眾發現校園內有一隻貓仔予
人關佇鐵籠仔內底，而且已經死亡，懷疑貓仔是予人刁工關入去，學校表示鐵籠仔原本是
欲用來掠流浪狗的，而且逐工攏有派人去巡，目前學校已經調附近的監視器查明原因。
（此則新聞標題、導言、內文皆為臺語文。）
鐵籠仔內底有一隻貓的屍體，籠仔頂懸有貼學校的名，陽明交通大學表示，因為進前捌發
生過流浪狗逐學生的事件，所以參動保所討論了後，有設籠仔欲來掠狗，而且逐工嘛會派
人來巡，毋知影為啥物有死貓佇內底，後續會來調查到底是發生啥物代誌。
學生講：「應該愛趕緊處理才著，若無囥踮彼爿真奇怪。」
陽明交大主任秘書蔡金吾解釋：「本校佇8月接著學生通報，校園內出現流浪狗逐學生的
情形，就參新竹市動保所討論，佇流浪狗出現的地點囥籠仔，而且逐工派人去巡。毋過針
對後來發生籠仔內，有貓仔死體的狀況，學校當咧調附近的監視器來理清案情。」
學校表示會去調附近的監視器查明原因，了解敢是有發生虐待動物的情形，新竹市動保所
接著通報了後，嘛隨派人到現場了解狀況。
新竹市動保護所所長楊家民講：「目前已經請校方調監視器，而且派人去學校進行訪談來
理清案情，動保所呼籲，依照動物保護法規定，任何人攏袂當騷擾、虐待、傷害動物，違
者會依法處理來維護動物福利。」
有學生表示，捌佇這个鐵籠仔內底看過關鳥仔，後來閣發現內底有貓仔屍體。原本是欲保
護學生，避免受著流浪狗傷害的籠仔，煞一直出現關無仝的動物，到底敢是校園內出現虐
待動物的代誌？目前學校以及動保所當咧調查。
曹詠涵/編輯