11:1 詭詐个天秤是耶和華所厭惡；公平个鉈子是伊所歡喜。
11:2 驕傲來，見誚亦來；總是智慧是甲謙卑个儂相甲佇啲。
11:3 正直个儂，伊个真實卜引娶伊；奸詐个人，伊个乖僻卜敗壞伊。
11:4 大受氣个日錢財无利益；只有公義會救儂脫離死无。
11:5 完全个儂个義卜舖平伊个路；獨獨歹(phaiN2)儂卜因為伊个歹跋倒。
11:6 正直个儂个義卜拯救伊；奸詐个儂卜互怹个歹掠著。
11:7 歹儂一下死，伊个向(ng3)望卜无去；罪人所欣慕个也无去。
11:8 義儂得著脫離患難，有歹儂做伊个替身。
11:9 无敬虔个儂用嘴害厝邊；獨獨義儂對知捌得著救。
11:10 義儂亨通，通城歡喜；歹儂滅无，儂攏出歡喜个聲。
11:11 城因為正直个儂个祝福就興起，總是因為歹儂个嘴就捙倒。
11:12 藐視厝邊个，是無知个儂；總是明理个儂靜靜无做聲。