公視新聞網 https://news.pts.org.tw/article/695725
新港文化館展覽關注海洋 塑膠糞埽做藝術品
發布時間：2024-05-18 19:15 更新時間：2024-05-18 20:05
林緯廷 / 嘉義報導
https://www.youtube.com/watch?v=49BEWPhqCss
經濟佮工業發展，海洋的塑膠糞埽愈來愈濟，嘉義縣、新港文教基金會，邀請生態環境藝
術家，展出用塑膠糞埽做的藝術品，思考海洋污染的問題。（這則新聞標題、前言、內文
為臺語文。）
策展藝術家林純用：「彼个我是參考海龜，成年的海龜的骨架做出來矣。」
藝術家向國小的學生囡仔，紹介伊的作品，遮每一項的作品頂面，攏有使用海洋抑是海邊
的糞埽，藝術家希望觀眾，透過怹的作品，來了解和反省臺灣目前的海洋環境。
策展藝術家林純用：「海裡遮的、海豬也好、海翁也好、海龜也好，有死亡的情況就是咱
人類造成矣，所以遮死亡的生物，我就共叫做新天使，遮的新天使就攏集合佇咱新港，這
个25號倉庫內底，來呈現做一間海神廟。」
除了海洋糞埽鬥起來的動物以外，藝術家閣佮主辦單位新港文化基金會，用前一陣新港宗
教活動抾轉來的糞埽，來設計辦桌的桌菜，欲透過這个作品，予民眾感受生活中的塑膠糞
埽，對環境的破壞。
參觀民眾：「原來這个糞埽，一寡遮的廢棄物，透過這个藝術家，會當變成一个足好的，
對這个環保教育足好的題材。」
新港文教基金會董事長陳永華：「這生活上所用著物件，希望逐家盡量來節省，予生活這
个受著汙染的部份，會當來減少。」
這个展覽會在新港文化館25號倉庫展出到七月初。新港文教基金會表示，臺灣的四箍圍仔
攏是海，望予民眾毋但知影海洋環境的重要，嘛來重視塑膠糞埽對環境的影響。
張曼亭/編輯