公視新聞網 https://news.pts.org.tw/article/698643
「中華一番」推出台語版 6/3開始YT連播12集
發布時間：2024-06-05 19:15 更新時間：2024-06-06 08:34
呂尚儒 莊浚佑 / 採訪報導
https://www.youtube.com/watch?v=g93fsU6fIa4
台語當時行，最近臺灣的動畫代理商，宣佈「中華一番」這齣經典的動畫，其中12集，對
拜一開始，佇Youtube推出台語版，動畫內底用活潑的台詞佮豐富的情緒，來呈現料理的
特色，推出了後，有真濟網友表示，聽著台語實在心適閣親切。
用活潑的台詞、佮豐富的表情和情緒，tshuā觀眾做伙來感受料理的口感佮特色，"中華
一番"是濟濟臺灣民眾攏捌看過的日本動畫，見擺佇網路放送的時嘛攏會引起濟濟討論，
臺灣的動畫代理商最近也趁燒推出台語版。
木棉花國際商務專案經理陳奕彣表示：「這个節目以早足濟人攏有看過，所以足有名，一
方面是因為內面有足濟對話，猶閣有足濟故事，是足出名 足好耍 足趣味的，所以咱就選
擇中華一番。」
代理商表示怹自"間諜扮公伙仔"台語版推出以來，收著濟濟熱情的回應，予怹想欲繼續試
無仝類型的動畫來做台語配音。這改"中華一番"以經典的「黃埔江樓麟艦宴席料理大賽」
來配台語版，像解師傅的黃金開喙笑、歹食印等等攏會出現佇劇情內。
台語版的中華一番配音員，嘛攏揣有10外年以上的老經驗，怹希望用生活化的台語，tshu
ā逐家同齊看這齣經典的美食動畫。
「小當家」角色配音員李明幸表示：「語言物件一定足深的，阮攏是那行那學，毋過你至
少愛有基礎，你若無基礎欲按怎改，你無法度改嘛 OK，所以你一定愛去上課。」
「雷恩」角色配音員 林谷珍表示：「台語(配音)是最近這幾年較開始，較有啦較濟啦愈
來愈濟，這嘛是一件好代誌，就予逐家較了解咱家己，本土的話是按怎講。」
台語版的"中華一番"自6/3開始一工播一集，攏總欲播12集。代理商指出目前網路的反應
袂bái，若是關注的人愈來愈濟怹嘛會考慮共52集全部配做台語，嘛希望引起逐家對台語
的興趣。
陳玟芯/編輯