公視新聞網 https://news.pts.org.tw/article/709927
舊曆8/3灶君生 新竹灶君爺廟煮圓仔食平安
發布時間：2024-08-14 19:15 更新時間：2024-08-15 08:36
張君豪 / 地方報導
https://www.youtube.com/watch?v=ToCshEci9I8
過去民眾厝內攏會有煮食的大灶，也會拜灶君，灶君較屬於是家神，較罕得有廟的主神是
灶神。毋過佇新竹縣北埔的五指山，有全台頭一間專門拜灶君的廟寺，舊曆8/3是灶君生
，今年也是這間廟滿120週年，廟方特別攢古早時代的灶，也會煮圓仔湯請逐家食平安。
（這條新聞標題、前言是臺語文。）
厝內面的廳桌頭若是有觀音媽檫仔，畫的神明內面有一位、清飄的少年人，就是灶王公。
是和咱生活誠接近的一位神明。新竹北埔的五指山、有全台灣頭一間專門拜灶王公的廟，
舊曆8月初3是灶王公的生日，今年也是這間廟滿120周年，廟方特別攢古早時代的灶，欲
煮圓仔湯請逐家食平安。
過去有袂少民眾攏會佇厝內的灶頂，貼相片抑是灶神的符仔拜拜求平安，綴時代改變、古
早時代用磚仔角做的灶，已經愈來愈少，毋過嘛有民眾講家己仝款會佇瓦斯爐邊仔，來拜
灶君。
民眾表示，「這馬的人嘛是用gá-suh爐邊仔，灶跤嘛是有貼灶王公拜拜，傳統就是拜灶
神趁較有食、趁較有錢。」
文化工作者呂世回：「較早是請灶神相片，貼著灶跤壁堵咧拜，現代的灶跤就攏是微波爐
彼寡，大灶就已經攏無去矣。」
新竹縣五指山的灶君爺廟，起佇1905年到今已經有120年歷史，文化工作者指出灶神踮道
教儀式中算是家神，所以較少看著有廟宇的主神是灶君爺，拜灶神嘛會當講是一款文化傳
承。
文化工作者呂世回表示，「算是文化傳承，傳承就是厝內雖然無拜灶神，逐家就會來拜這
位灶君爺。」
新竹縣五指山觀光發展協會理事長巫春玉：「灶神是負責對天頂報好事，以及來保庇人平
安，所以這是阮在地五指山，有這灶君爺廟是，阮大隘三鄉北埔人的幸福，愛用甜的物件
來拜灶神，因為食甜甜了後，去玉皇大帝面前幫忙講好話，這是一款傳統。」
舊曆8月初3是灶君的生日，除了有相關慶祝活動以外，今年拄好是這間廟滿120周年，廟
方嘛特別攢古早時代的灶，用來煮圓仔湯予逐家食甜甜、保平安。
記者 張君豪 新竹報導
盧元媜/編輯