公視新聞網 https://news.pts.org.tw/article/711754
臺南頭改辦臺灣文博會 超過570个品牌參展
發布時間：2024-08-26 19:15 更新時間：2024-08-26 22:34
https://www.youtube.com/watch?v=yd0h97L92sc
「臺灣文博會」今年頭改徙來臺南舉辦，主展區8/28欲起鼓，有超過570个文化品牌來參
展，是有史以來規模上大的。另外，臺南市文化局共子展區延伸到「321巷藝術聚落」等
無仝的文創園區，欲予府城成做一个大型的歷史教室。（新聞標題、導言及內文，皆為臺
語文）
古錐的báng-gà尪仔逐家搶欲翕相，嘛有當時行的IP授權來參展，今年臺灣文博會頭改
佇臺南舉辦，大臺南會展中心成做主展區，攏總超過570个品牌來鬥熱鬧，是規模上大的
一改。這回展覽以「寶島百面」做主題，活動嘛用台語文來做標題，而且拍破傳統，共文
化策展參品牌商展做結合。
台語嘛會通負責人 洪子桂：「阮攏是台語的物件，親像這个是鰗鰡，阮就畫這个拳頭，
用較趣味的物件予來參加的人，會當學習台語。」
文化部長 李遠：「寶島百面若用台語講就是，百分之百、百面會成功。（咱臺灣）經過
真長的時間，經過無仝的歷史、時代，咱總算行出家己的路矣。文博會佇臺南展出，是對
咱全臺灣的文化界上重要的代誌。」
展覽毋干焦一樓，三樓以「細胞做伙」做主題，打造劇場感的展示空間；若這間棒球場的
空間，呈現臺灣運動賽事，逐家拚勢予世界看著這片土地。另外，地方館參屏東佮澎湖合
作，無論是有形、無形的文化資產，抑是海島文化，攏通一改佇遮看予夠氣。
總策展人 羅健毓：「那聽那行，那看那記，哪會按呢。哪會按呢就是阮有足濟的論壇講
座，閣有戶外演出的表演活動，其實就是透過各種無仝的文化的樣貌，邀請各位鄉親朋友
來到這个現場，會當感受著臺灣文化的量能。」
主展區28起鼓，連紲五工免費開放予鄉親入場。另外，分展區是延伸到臺南文創園區、
321巷藝術聚落等所在，共整座府城成做大型的歷史教室，提供逐家浸水式的文化體驗。
記者 李晨宇 臺南採訪報導
唐嘉良/編輯