公視新聞網 https://news.pts.org.tw/article/713434
年初彰化三姐弟過路予車挵著 10歲阿姊今過往
發布時間：2024-09-05 19:15 更新時間：2024-09-05 19:27
楊舒晴／彰化報導
https://www.youtube.com/watch?v=8I7xJRPKOjU
今年二月彰化伸港發生三姊弟仔行斑馬線過車路的時，予車挵著的意外，其中9歲佮10歲
的姊妹受重傷、昏迷半年外，今仔(9/5)早起10歲的姊姊因為中樞神經衰竭過往，家屬攏
真毋甘，抑若9歲的妹妹目前佇彰化漢銘基督教病院治療，昏迷指數三，病院持續透過中
醫、復健治療，目前性命現象穩定。（此則新聞標題、導言、內文皆為臺語文。）
今年二月因為車禍受重傷的10歲、姓陳的查某囡仔，經過197工的醫治，初五早時因為中
樞神經衰竭過往，家屬接到消息，攏真傷心。
陳家小弟弟予記者問：「有想姐姐無？」的時，講「真想伊」。
陳家家屬講：「這馬姊姊的情形已經按呢囉，希望妹妹會當較緊好起來，因為弟弟真正足
想伊的。」
秀傳病院神經外科主任鄭均洹表示：「這中間捌佇3/13精神，但是真不幸 5/1的時，因為
急性水腦症昏迷，後來中樞神經衰竭，佇今仔日(9/5)早起6點55分過身。」
今年二月蹛佇伸港三姊弟仔挵紅燈過車路、行佇斑馬線，煞不幸予一位無駕照駛車的蕭姓
駕駛挵著，造成9歲佮10歲的姊妹仔受重傷，初五這工10歲的姊姊因為中樞神經衰竭過身
，9歲的妹妹目前是佇咧漢銘基督教醫院治療。
漢銘基督教病院院長陳志輝講：因為伊拄來的時陣是用呼吸器，重度昏迷，昏迷指數3分
，阮希望會當做長時間的抗戰。所以阮真注意，因為長時間用吸呼器可能會造成的併發症
。」
漢銘基督教病院表示，9歲的姓陳的細漢小妹，因為昏迷時間久，除了愛注意併發症的發
生、病院嘛積極透過復健科復健佮中醫科調理，目前性命現象猶算穩定。
曹詠涵/編輯