公視新聞網 https://news.pts.org.tw/article/719368
彰化比賽啥人上gâu食炕肉飯 醫生：恐驚胃破空
發布時間：2024-10-14 19:15 更新時間：2024-10-15 08:31
楊舒晴／彰化報導
https://www.youtube.com/watch?v=PrJ4AYVOX0I
為著行銷彰化的炕肉飯，彰化縣政府進前舉辦炕肉飯gâu食比賽，八分鐘內食五碗炕肉飯
，看啥人上緊。毋過有醫師指出，過去舉辦食比賽捌發生過胃破空的意外，縣府無應
該歹tshuā頭辦這種比賽，縣府表示，活動有安排醫療人員待命，未來辦活動也會詳細思
考舉辦的模式。（此則新聞標題、導言、內文皆為臺語文。）
逐家一喙接一喙，認真扒飯，這是彰化縣10/12舉辦的炕肉飯gâu食比賽，看啥人會當上
緊佇八分鐘內食五碗炕肉飯，現場也有分免錢的炕肉飯，活動唌袂少人參加。但是就有醫
師指出，gâu食比賽對健康有敗壞，縣府無應該歹tshuā頭。
員林基督教醫院協同院長陳守棟講：「較無健康啦，若欲好消化應該愛沓沓仔食，予咱的
喙瀾佮食物混合，按呢較好消化，一睏仔食五碗，量實在是傷濟，對咱的健康來講是較無
好。」
醫師指出一般人胃的容積，是1.2至1.5公升，若是傷過脹、上嚴重的話可能會胃破空、胃
出血，但是嘛有民眾認為，活動誠趣味，參加的人家己愛評估身體狀況，縣府表示，比賽
彼一日攏有醫療團隊佇現場、掌握狀況。
民眾認為：「袂bái矣！免錢的飯好食。」、「好耍就好啦，我感覺參加這个活動莫拚名
次，就是來參加彰化辦的活動，唌民眾來彰化tshit-thô。」
彰化縣政府城觀處長王瑩琦講：「這擺的炕肉飯gâu食活動，主要是用活潑的方式來行銷
彰化的炕肉飯，所以是用趣味比賽的方式進行，現場有安排醫護人員待命，嘛有保險，以
防萬一。」
縣府強調，活動事先攏有提醒民眾愛撙節，安全第一，逐家對gâu食比賽的意見，in攏有
聽著，未來若辦活動，會納入各界的意見、詳細思考舉辦的模式。
曹詠涵/編輯