公視新聞網 https://news.pts.org.tw/article/722102
康芮擾亂祭典 臺南武德宮共王船拖轉府內囥
發布時間：2024-10-31 19:15 更新時間：2024-11-01 00:05
https://www.youtube.com/watch?v=jguAlWvTmOc
康芮風颱掃來臺灣，廟宇仝款愛做好防颱，尤其閣拄著欲送王船。親像臺南仁德十三甲武
德宮，只好共已經出府的王船閣拖轉去囥；抑若另外一搭武英殿，廟方暫時先共船頂鯉魚
公請落來，兼用鐵仔來共船身楗牢咧。（新聞標題、導言及內文皆為臺語文）
臺語台記者 李晨宇：「這馬記者就佇十三甲武德宮，本成這王船是佇平安橋遐，會使予
民眾祈求保平安，不而過這改風雨是有較大，致使廟方落尾是共神明請示，結果是先共王
船徙入去王船府內底，就驚船身去予損蕩去。」
這回閬18年的建醮大典，廟方今仔做好這隻欲予人朝拜的王船，頂禮拜六才熱鬧出府爾，
煞拄佇風颱來擾亂，驚風雨傷大，落尾廟方先共王船拖轉去王船府囥。另外，in嘛做一隻
替身欲來送王使用，王船廠本來門攏拍開的，這陣暫時攏先關起來。
仁德十三甲武德宮總幹事 蘇進男：「王船先請回咱的王船府，按呢較安全。咱的牌樓參
較大的所在，阮攏先拆除、拆落來。」
文史工作者 謝奇峰：「足濟物件是活的啦，宗教欲愛予咱有智慧。正常來講（王船）是
拖出來，無閣入去矣，毋過是真正風颱傷大，你若王船因為按呢共挵歹去，按呢後壁欲送
王船欲按怎？」
另外這爿仝款有王船的武英殿，閬28冬，這陣當咧做王猷大典，按算初三欲送王，這陣王
船是佇廟埕外口，廟方講，目前有用做枋模咧用的鐵仔來楗牢咧，嘛驚食風，船身會搟，
就有志工駛家己的車來予船靠牢咧，厝邊頭尾嘛煩惱祭典受影響。
在地居民：「拄著這風颱嘛無法度。（記者：敢會煩惱王船受損？）逐家攏會煩惱。」
南廠武英殿總幹事 林柏宇：「阮共頂懸的帆佮桅三支攏共請落來，包括咱頂懸的押班水
手、鯉魚公，攏提早先共請落來。」
康芮颱風的暴風半徑大，影響臺灣的時間長，範圍嘛較大，咧做醮的廟宇是拚勢咧防災，
就向望這科醮通會使順利圓滿。
記者 李晨宇 臺南採訪報導
唐嘉良/編輯