公視新聞網 https://news.pts.org.tw/article/725347
11/27冷氣團閣來 北部降到14度、中南部16度
發布時間：2024-11-21 19:15 更新時間：2024-11-21 22:46
https://www.youtube.com/watch?v=qtiS2cJejnQ
拜四全臺灣平地上低溫，出現佇新北的富貴角、石碇仔，只有16度7；毋過，上寒的時間
猶未到。氣象署表示，後禮拜東北季風會閣變強，27無排除會出現一陣的冷氣團，北部地
區上低溫有可能來到14度；中南部低溫嘛可能只有16度。（新聞標題、導言及內文皆為臺
語文）
台北市過青紅燈的民眾，每一个人身上，攏有外套、喙罨、雨傘，這三種基本裝備，規身
軀包牢牢。拜四受東北季風影響，北部、東半部溫度佇19─23度；中南部地區，早暗溫差
，差欲10度，高溫25─29度、低溫19度─22度。毋過，上寒的時間猶未到，氣象署表示，
後禮拜有一波冷氣團落來，北部上低溫干焦賰14度；中南部地區嘛干焦16度。
氣象署預報員 李孟軒：「若是以北部來講，低溫大概會佇14─15度左右；若佇中南部地
區，大概會懸一寡，佇16度左右。」
除了天氣冷吱吱，予人感覺真愛睏，北部、宜蘭地區，連紲落規禮拜的雨，嘛予人感覺真
齷齪。氣象署表示，北部、宜蘭地區會落到拜六，禮拜日東北季風減弱，全臺灣會出現難
得的好天。毋過，27開始，閣會開始出現落袂停的雨。
氣象署預報員 李孟軒：「若到27，整體來講，會有一寡華南水氣入來。所以後禮拜是落
雨（範圍）上闊的一工，除了佇北部、東半部以外，佇中南部山區，預估嘛會有一寡局部
的雨勢。」
氣象署表示，拜四全臺平地，上低溫佇新北的富貴角、石碇，干焦16.7度。氣象署嘛提醒
民眾，把握禮拜日難得的好天，趕緊共外套、棉被款出來，準備迎接後禮拜的全臺冷吱吱
的天氣。
記者 鄭亞宣 許猛捷 臺北報導
唐嘉良/編輯