公視新聞網 https://news.pts.org.tw/article/725544
慶祝開台五週年 臺語台辦演唱會謝觀眾支持
發布時間：2024-11-22 19:15 更新時間：2024-11-22 23:17
https://www.youtube.com/watch?v=ABENaRnhrLY
公視臺語台已經5年囉！明仔載（23）暗時六點，欲佇高雄流行音樂中心的海音館，舉辦
《彼時 這時 想當時》演唱會，感謝鄉親一路陪伴臺語台成長。現場有演員用搬戲的方式
串聯故事，會安排10組歌手上台演唱。邀請逐家做伙來聽歌。（新聞標題、導言及內文皆
為臺語文）
【涉己新聞】
歌手 潘芳烈：天頂的月娘啊，我輕輕叫一聲。望伊會知影啊。
唱入心肝底的這條台語經典歌〈天頂的月娘〉，資深音樂創作者潘芳烈作詞、作曲，浪子
嘛有柔情的一面，潘老師做的歌，逐條都感動人心！
歌手 王瑞霞：情絲啊，情絲；相思啊，相思。今生，今世，阮用心等待你。
閣有臺語歌壇的「漂亮寶貝」王瑞霞，演唱的〈用心等待你〉，仝款予眾人聽甲耳仔phak
-phak-phak！公視臺語台慶祝開台五週年，特別辦演唱會，感謝鄉親朋友一路的支持，五
年前臺語台開台是佇基隆港邊，這陣轉南部，佇高雄流行音樂中心海音館，23暗時六點，
《彼時 這時 想當時》演唱會，免費予民眾來聽歌。
歌手 王瑞霞：「五週年呢！我會當來參加著《彼時 這時 想當時》的演唱會，我感覺足
幸運的。感謝恁的支持、感謝恁的愛護。」
歌手 潘芳烈：「這是咱的母語，袂使去予放袂記得咧。加聽台語歌嘛是一種方法。其實
這馬有真濟少年囡仔，咧做的台語歌，攏真好聽呢，袂輸阮這老班的咧。」
毋但高雄獨立樂團夕陽武士、方順吉、翁鈺鈞、荒山亮等等十組歌手，輪流演唱，現場閣
請演員黃尚禾用戲劇串聯所有歌曲，就若一塊卡拉，放的攏是咱人生的「彼時、這時、想
當時」！
記者 洪敏真 賴威佐 高雄報導
唐嘉良/編輯