公視新聞網 https://news.pts.org.tw/article/732567
迎接款年貨人陣 臺北迪化街1/11-1/27禁薰
發布時間：2025-01-07 19:15 更新時間：2025-01-07 19:40
鄭亞宣 許猛捷／臺北報導
https://www.youtube.com/watch?v=tJsfqKGtwNw
過年就欲到矣 ! 這馬臺北迪化街已經真有過年的氣氛，每一間店家攏共年貨攢出來矣，
一寡民眾嘛提早來採買年貨。臺北市政府宣布，今年1/11~1/27這段期間，民眾來到迪化
街是禁止食薰的，上重會開罰一萬箍，著愛注意。（此則新聞標題、導言、內文皆為臺語
文。）
這個月欲過年、臺北迪化街年貨大街有店家已經共年貨排滿滿，攢的量比平常時加出3倍
，像香菇、烏魚子、干貝，來買年貨的人客真濟，頭家娘無閒咧收錢，伊講照過去的經驗
，差不多對11拜六開始，迪化街逐工預估會有十萬外人來搬年貨。
店家講：「1/11開始才有人，開始人就足濟，一工差不多有十萬人。」
毋過往過攏會有人，反應講來迪化街採買年貨的民眾、捷會佇遮食薰空氣真bái。為著欲
予民眾，歡歡喜喜來搬年貨轉厝，臺北市政府公告，自1月11到27這段時間，規條迪化街
攏禁止食薰，若無會開罰六千至一萬箍，另外為著欲方便採買民眾、也有免費的交通車通
坐。
臺北市商業處處長江美玲講：「規个年貨大街期間攏禁薰的，阮嘛會有相關單位做一寡禁
薰方面的稽查。」
今年是臺北迪化街年貨大街30周年，市府為著欲慶祝，這改有佮臺北市超過100間的店家
合作，推出濟濟年節的活動佮好康的禮物，欲予民眾來到迪化街除了踅街採買、也通享受
過年的鬧熱氣氛。
曹詠涵/編輯