公視新聞網 https://news.pts.org.tw/article/733144
北管結合西洋樂器 曾立馨譜傳統歌曲新風貌
發布時間：2025-01-10 19:15 更新時間：2025-01-10 23:28
https://www.youtube.com/watch?v=ZPYmyCkTg_I
過去干焦佇廟會才聽會著的北管音樂，這陣也會當成做流行歌。創作歌手曾立馨，嘛是北
管樂團的子第，伊共北管音樂的元素透濫佇流行歌的創作內底，加入西洋樂器合奏，予傳
統音樂會當有新齣頭。（新聞標題、導言及內文皆為臺語文）
這位是創作歌手曾立馨，伊嘛是彰化北管樂團──梨春園的子弟，因為真佮意北管音樂的
鬧熱聲佮唱曲的幼口，七年前特別搬來彰化、學北管，伊也共北管音樂透濫佇伊的創作內
底，閣邀請客家歌手同齊合作，予傳統音樂變出新魍。
歌手 曾立馨：「北管毋是干焦有喪的，抑是佇廟會才出現的音樂。所以我就寫佇流行歌
內底，共西洋的樂器，譬如Bass、gì-tà、鼓，落去鬥陣濫做伙，予逐家聽起來是無仝
款的感覺。」
歌手 范宸菲：「我家己足佮意台語抑是講客話，這兩个母語的使用，去學習。其實一个
文化，你想欲去了解，你就是愛對語言開始，因為語言是涵蓋各種文化。」
曾立馨進前推出個人頭一張台語專輯，共學北管佮生活的點點滴滴，攏寫佇歌內底，閣特
別佇梨春園曲館頭前，翕音樂錄影帶，閣有北管扮仙戲，共傳統佮流行音樂做敆流。
「學習北管的文化，有三冬外，予我來唱著古早的歌聲。」
台語老師 鄭順聰：「其實北管較早就是，古早的Rock Band 時行的音樂。曾立馨伊所做
的就是，共傳統北管佮戲園做敆流。這馬大部份的囡仔，對這種臺灣傳統的文化足生份的
，因為生份會產生趣味。」
鄭順聰表示，這陣有袂少新一代的歌手佮樂團，開始共南北管、月琴遮的傳統樂器，加入
去流行歌的創作，除了予傳統音樂耍出新的步數，嘛予臺語歌愈來愈多元腥臊。
記者 楊舒晴 彰化報導
唐嘉良/編輯