前幾工仔寫兮，感覺會使鋪佇遮
西班牙佇中世紀兮時，其實有足濟國家，大概會使分做兩爿，北爿是基督教兮國家，南爿是
伊斯南教兮國家。兩爿為著搶領土，以及宗教兮差別，真無對同，定不時嘛拍來拍去，戰甲
流血流滴。毋過嘛捌有偷來暗去，揣對面無仝教兮來做伙應付家己兮教友鄰國這款代誌，規
个半島勢面有影花嗄嗄。
佇公元九世紀初期，有基督徒佇岳里施野 (Galicia) 揣著聖徒聖雅各兮墓，自按呢發展起
來，成做基督教世界誠重要兮聖地，吸引袂少基督徒去遐朝聖。遮兮信徒寄付兮緣金嘛予西
班牙基督教國家大趁錢。甚至有信徒留落來，做伙對付南爿兮伊斯南教國家。原底守佇半島
西北部山區，參基督教世界沒啥交插兮基督教西班牙，嘛自按呢開始和歐洲交流，得著歐洲
國家兮幫贊。
公元十一世紀，西班牙兮伊斯南教國家沓沓仔咧落衰。為著應付北爿兮威脅，怹着去揣閣較
南爿，徛佇咧北非兮伊斯南教國家來鬥跤手。毋過，代誌毋是戇人所想兮遐呢簡單。新來兮
跤數野心傷大，竟然共西班牙兮伊斯南教國家攏總拆食落腹，暗算欲一統半島，落尾才去予
北爿兮基督教國家拍敗，跤底抹油走路轉去北非。
這着是咧共逐家講，朋友愛揣會正經鬥相共兮，嘛毋免驚好朋友來厝裡行踏。阿若彼號會反
背兮、搶火燒兮，愛好是閃較遠兮，上好無交插。