http://talk.ltn.com.tw/article/paper/932451
《自由廣場》台語文學新時代到位
2015-11-15 06:00
◎ 陳金順
十一月十三日（拜五）下晡彼場文學盛會─第三十八屆吳三連獎贈獎典禮，見證台語文
學的新時代到位。
小說家胡長松以《復活的人》等五本台語小說，拍破紀錄成做頭一位以台語文學得著吳
三連文學獎的作家。這個大好消息，對在來被所謂「主流」文壇參媒體看輕的台語文學
界來看，的確是一件值得寫入歷史的頭條新聞。
頒獎人宋澤萊佇致詞的時表示：「吳三連獎將文學獎頒予用台語文寫作的作家，文化視
野比國家文藝獎閣較闊嘛較懸。」伊認為台語文學的新時代來矣，國內重要的文學獎無
應該閣繼續看輕台語文學，必須要共獎項頒予台文作家。
得獎者胡長松佇會中嘛發表一篇宣言式的感言。伊表示：「我一直相信，全世界上好的
文藝作品，攏是對各族群的文化、歷史、風土、語言的肥底發穎」，這段宣言講出台文
作家的自信嘛徛在母語創作的正當性。
成做一位參胡長松多年做陣戰鬥的友志，親身見證伊得著吳三連文學獎的榮光，內心不
止仔激動佮歡喜。同時對家己嘛對所有頂真拍拚的台文作家講：「咱的筆愛不斷寫落去
，寫出台語文學的新傳奇。」
（作者為台語文學作家）