台語與我
我是一個按台南到台北讀大學e5外地人。細漢e5時，我的父母做生理
足無閑，沒有時間來照顧我。我就和阿公阿嬤住一起，阿嬤兜遐厝邊隔壁
大家攏講台語，我細漢鬥陣chhit-tho e5囝仔伴嘛隴講台語，所以我的童
年會使講是tih台語e5環境中大漢。
씠 讀幼稚園e5時，我抑be曉講國語，有一遍我上課遲到，老師問我na
hiah-nih慢來學校，我直直kap老師講：「因為kau紙、kau紙……」。老師
聽攏無，問我是不是因為在厝「chian紙??」我心裡是有夠急，怕老師摃腳倉
，不閣煞不知按怎講用國語解釋互老師聽。其實「kau紙」是因為我家做紙e5
生理，常常紙廠會進紙到店面，我細漢定定聽阿公講「kau紙」，但是並無了解
是啥mih意思，所以嘛不知按怎解釋。後尾那天我後老師罰站，老師擱叫我另日
不使「chian紙」chian到boe-ki來上課……，be曉講國語e5我實在足委屈、足
可憐。
等我讀國中了後，我代表學校去參加「台南市台語演講比賽」，我擱會記
得換我上台演講e5情形，我是有夠緊張，兩枝kha pi3 pi3 chhoah，身軀和嘴
是分開e，我的表情足豐富，動作非常大，假那在搬戲。想不到評審先生真欣
賞我的演講(大概是看在我面皮厚的份上)，互我第一名，我實在是難以相信，
不過嘛是足歡喜，這是一件光榮e5代誌。
到我高中e5時，我代表台南市參加「口說藝術比賽」kah「台語演講比賽。
這嘛是我真正對台語文化深入了解e5關鍵，在台南市政府訓練過程中，延請真
濟研究台語專家來指導，除了糾正阮不正確e5發音(因為阮這代e5少年人，很濟
字發音攏m著)，同時安排「詩詞吟唱」和「台語文欣賞」e5課程，我才由衷e5
感覺，台語是一個很水e5語言。尤其用台語吟唱古詩，kap古詩押韻e5特色完全
表現出來，不同e5調唱出不同的心情，我那聽到，心裡足感動，原來我自細漢
定在講e5語言有即呢迷人美麗e5所在。
代表台南市參加全省e5演講比賽，互我看到截然不同e5世界。當我在準備
上台e5時，我斟酌聽別人e5演講，我發現in講e5台語我有真多聽無，不同縣市e5
腔調不同，有時我聽kap霧煞煞，真正是牛頭對無馬嘴。不過等我上台時，已經
kah卡早是不同，落落大方、穩重、自信，我boeh把最好聽、最正確e5台語表達
互大家聽。比賽結果出來，我得全國第四名，雖然不夠滿意，不過嘛是一件使人
驕傲e5代誌。
上大學以後，我真少講台語，除了去南友會kah同鄉的朋友作伙會講一嘴流
利e5台語之外，平常時足少機會講台語囉。這學期發現通識課有開台語的課程，
我想攏無想就選這門課，我感覺真趣味、真親切，聽到教授、助教上課攏講台語
，我非常歡喜，這是一門大家攏愛說台語e5課，嘛互be曉講台語e5人學台語，我
看見教授推廣台語的用心，嘛看到所有為保存咱e5母語的人e5堅持，咱愛作伙努
力下去，未凍互台灣成為失根e5土地。
要愛台灣嘛要先認同咱自己e5語言，愛台灣就是『愛講台語』，台語e5保存
kah推廣需要大家鬥陣來！！